एकताई गावात पाच दिवसांपूर्वी विहिरीत तरंंगताना आढळला होता मृतदेह, आज आले सत्य समोर

अमरावती : घरात घुसून ओळखीतील व्यक्तीने पत्नीसोबत असभ्य वर्तन केल्यामुळे चिडलेल्या पतीने आपल्या मेहुण्याला सोबत घेऊन एकाचा खून केला. पाच दिवसानंतर विहिरीत सापडलेल्या मृतदेहाचे रहस्य अखेर उलगडले.

दिलीप रामराव वरठी (वय ३०, रा. रंभा, भैसदेही, मध्यप्रदेश) असे खून झालेल्या व्यक्तीचे नाव आहे. रविवारी (ता. २३) रात्रीच्या सुमारास चिखलदरा तालुक्यातील एकताई गावात ही घटना घडली होती.

अधिक माहितीसाठी - पोलिस दलातील वरिष्ठ अधिकारी नाराज! काय आहे नेमका बदल्यांचा ‘पेच’

याप्रकरणी संतुलाल भुता बेठेकर (वय २९) व मेहुणा संजुलाल राजमा तोटे (वय २६, रा. कुणखेडी, भैसदेही) या दोघांना अटक करून त्यांच्याविरुद्ध खून व पुरावा नष्ट केल्याप्रकरणी चिखलदरा पोलिसांनी गुन्हा दाखल केला आहे. असे पोलिस निरीक्षक आकाश शिंदे यांनी सांगितले.

एकताई येथील बबलू बेठेकर यांच्या विहिरीत दिलीप वरठी यांचा मृतदेह २३ ऑगस्ट रोजी आढळला होता. प्रारंभी पोलिसांनी अकस्मात मृत्यू अशी नोंद केली होती. चिखलदरा पोलिसांनी या प्रकरणाची चौकशी सुरू केली. घटनेच्या एका दिवसापूर्वी २२ ऑगस्ट रोजी रात्रीचे वेळी दिलीप वरठी याने संतुलालच्या घरात घुसून पत्नीशी अश्लील वर्तन केले होते.

क्लिक करा - आयुक्त मुंढेच्या बदलीसाठी कोणी केला समझोता?, वाचा सविस्तर

त्यामुळे चिडून संतुलालने मेहुणा संजूलालच्या मदतीने वरठी यास गाठले. काठीने प्रहार करून दिलीपचा खून केल्यावर पुरावा नष्ट करण्यासाठी मृतदेह विहिरीत फेकला. अशी कबुली संतुलाल व संजुलाल या दोघांनी दिली. न्यायालयाने दोघांनाही सोमवारपर्यंत (ता. ३१) पोलिस कोठडीत ठेवण्याचे आदेश दिले आहे.

शवविच्छेदन अहवाल प्राप्त
शवविच्छेदन अहवाल प्राप्त झाला आहे. त्यात दिलीप वरठी याला आधी काठीने मारहाण करून खून केल्यानंतर मृतदेह विहिरीत फेकल्याची बाब नमुद आहे. त्यामुळे हा गुन्हा दाखल झाला.
- आकाश शिंदे,
पोलिस निरीक्षक, चिखलदरा.

संपादन - नीलेश डाखोरे