Nagpur News : बापरे.. घरात आढळले सव्वीस साप; भिलगाव कामठी येथील घटना

नागपूर : साप म्हटले की भल्याभल्यांची तारांबळ उडते. पण एक दोन नव्हे, तर तब्बल २६ साप एका घरात आढळले असे सांगितले तर तुमचा विश्वास बसणार नाही. पण हे खरे आहे. भिलगाव कामठी येथील बिसन गोंडाणे याच्या घरी सापांची तब्बल २६ पिल्ले आढळून आली आणि संपूर्ण गावात खळबळ उडाली. पाहता पाहता बातमी वाऱ्यासारखी पसरली आणि घराबाहेर बघ्यांची गर्दी जमली.

गोंडाणे यांना घरी दोन साप दिसल्याने कुटुंबीय खूप घाबरले. त्यांनी तातडीने वाइल्डलाइफ वेल्फेअर सोसायटीचे सदस्य सर्पमित्र सागर चौधरी यांना ही माहिती दिली. ते सर्पमित्रांना घेऊन घटनास्थळी पोहचले. सापांना पकडण्यास सुरवात केली.

थोडा कचरा काढल्यानंतर सागरला सापाची आणखी पिल्ले दिसली. साप बिनविषारी असल्याचे त्यांनी सांगितले. अथक परीश्रमानंतर एक एक करून तब्बल सव्वीस साप त्यांनी पकडले. कुटुंबीयांनीही सुटकेचा निःश्वास टाकला. या पिल्लांना त्यांच्या नैसर्गिक अधिवासात सोडण्यात आले.

पावसामुळे सापाच्या वारुळात पाणी आणि माती जमा होते. त्यामुळे ते बाहेर येतात आणि नवीन अधिवास शोधतात. आता उन्हाळा असला तरी दोन दिवस झालेल्या पावसाने हे साप वारुळाच्या बाहेर निघाले असावेत. तसेच थंड वातावरणामुळे ते वारुळातून बाहेर निघून अशा घरांमध्ये शिरले असल्याचे सर्पतज्ज्ञांचे म्हणणे आहे.