डॉ. उपाध्याय यांची मुंबईला बदली, उपराजधानीला मिळाले नवे आयुक्त

नागपूर : शहराचे नवे पोलिस आयुक्त म्हणून अमितेश कुमार यांची नियुक्ती करण्यात आली आहे. नागपूरचे आयुक्त डॉ. उपाध्याय यांची मुंबई वाहतूक शाखेचे अतिरिक्त पोलिस महासंचालक म्हणून बदली करण्यात आली आहे.

गेल्या पाच महिन्यांपासून रखडलेल्या बदल्यांचा अखेर मुहूर्त निघाला. गृहमंत्रालयाने बुधवारी ४५ आयपीएस दर्जाच्या पोलिस अधिकाऱ्यांच्या बदल्या केल्या आहेत. सूत्रांनी दिलेल्या माहितीनुसार, नागपूरचे पोलिस आयुक्त डॉ. भूषणकुमार उपाध्याय यांचा दोन वर्षाचा कार्यकाळ पूर्ण झाला आहे. त्यामुळे त्यांची बदली निश्‍चित होती. परंतु, पुण्याचे पोलिस आयुक्त डॉ. के. वेंकटेशम आणि ठाण्याचे पोलिस आयुक्त विवेक फणसळकर यांना मुदतवाढ मिळाल्याने डॉ. उपाध्याय यांनाही मुदतवाढ मिळण्याची शक्यता वर्तविली जात होती. 

वाचा - सावधान! सर्वात मोठ्या धरणाचे 33 दरवाजे उघडले.. इतिहासातील सर्वात मोठा पाण्याचा विसर्ग; जिल्ह्यात पुराचा धोका वाढला
 

मात्र त्यांची मुंबई शहर दलात वाहतूक शाखेत अतिरिक्त पोलीस महासंचालक पदावर बदली करण्यात आली. दरम्यान राज्य गुप्त वार्ता मुंबई (एसआयडी) येथील सहआयुक्त अमितेश कुमार यांना पदोन्नती देऊन नागपूरच्या आयुक्तपदी नियुक्ती देण्यात आली आहे. अमितेश कुमार हे १९९५ बॅचचे आयपीएस अधिकारी आहेत. यापूर्वी त्यांनी नागपूर शहरात काम केले आहे. त्यांनी नागपूर वाहतूक शाखा आणि परिमंडळ दोनचे पोलिस उपायुक्त म्हणून जबाबदारी सांभाळली आहे. 

तूर्तास एकूण ४५ जणांच्या बदल्यांच्या आदेशावर मुख्यमंत्र्यांची स्वाक्षरी झाली आहे. तर उर्वरित बदल्यांच्या यादीवर शुक्रवारी स्वाक्षरी होण्याची शक्यता आहे. यासोबतच नागपूरच्या सहआयुक्तपदी प्रदीप देशपांडे यांच्या नावाची चर्चा जोरात आहे. देशपांडे यांनी यापूर्वी नागपूर ग्रामीणचे पोलिस उपअधीक्षक पदावर काम केलेले आहे. तसेच अमरावती शहरात पोलिस उपअधीक्षक पदावरही काम केले आहे. 

महावारकर यांची बदली

नागपूर शहर पोलिस दलाचे अतिरिक्त पोलिस आयुक्त डॉ. शशिकांत एच. महावारकर यांचीही बदली करण्यात आली. त्यांना सिडको येथे पोलिस उपमहानिरीक्षक व दक्षता अधिकारी पदावर नियुक्ती देण्यात आली. सध्या नागपुरात एकच अतिरिक्त आयुक्त असल्यामुळे त्यांच्यावर संपूर्ण शहराचा प्रभार होता.