तिने प्रेम सिद्ध करण्यासाठी केला न्यूड व्हिडिओ कॉल, अन्...

नागपूर : फेसबुकवरून झालेल्या मैत्रीचे रूपांतर प्रेमात झाले. प्रियकराने प्रेम सिद्ध करण्यासाठी थेट ‘न्यूड व्हिडिओ कॉल’ करण्याची अट घातली. प्रेयसीने अतिविश्‍वास ठेवून व्हिडिओ कॉल केला. मात्र, प्रियकराने तो कॉल रेकॉर्ड करून सोशल मीडियावर व्हायरल करण्याची धमकी दिली. या प्रकरणी प्रेयसीच्या तक्रारीवरून जरीपटका पोलिसांनी गुन्हा दाखल केला. आर्यन ऊर्फ वैभव राजू आवारी (रा. हिंगणघाट, वर्धा) असे आरोपीचे नाव आहे.

पोलिसांनी दिलेल्या माहितीनुसार, १८ वर्षाची तरुणी रिया (बदललेले नाव) ही बी. एस्सी प्रथम वर्षाला तर वैभव हा व्दितीयवर्षाला शिकतो. एकाच गावी राहत असल्याने एकमेकांची ओळख होती. काही दिवसांपूर्वीच ती नागपुरात नातेवाइकांकडे राहायला आली. तिला वैभवची फेसबुकवर फ्रेंड रिक्वेस्ट आली. दोघांची चॅटिंग सुरू झाली. एकमेकांचे मोबाईलवर बोलणे सुरू झाले. व्हॉट्स अ‍ॅप चॅटिंग अन् फेसबुकवर त्याचे प्रेम फुलले.

त्यांच्या मैत्रीला केवळ तीन वर्ष झाले. त्याने तिला आपल्या जाळ्यात ओढल्याने त्याच्यावर पूर्ण विश्वास बसला. दरम्यान तिने तिच्या मैत्रिणीची ओळख त्याच्याशी करून दिली. ओळख होताच तो रियाकडे दुर्लक्ष करायला लागला. तिच्या मैत्रिणीशी मोबाईलवर बोलायला लागला. हा प्रकार रियाला माहिती झाला. तिने वैभवची चांगली खरडपट्टी काढली. त्याने रियाच्याही चारित्र्यावर संशय घेत दुसरीकडे प्रेमप्रकरण सुरू असल्याचा आळ घेतला. त्यामुळे तिला आपले प्रेम सिद्ध करण्यासाठी अट घातली.

तिला न्यूड व्हॉट्स अ‍ॅप कॉल करण्यास सांगितले. तिनेही प्रेम सिद्ध करण्यासाठी वैभवला व्हिडिओ कॉल केला. मात्र, त्याच्या मनात काळेबेरं असल्यामुळे त्याने मोबाईल स्क्रीन रेकॉर्डिंग केली. त्यानंतर तो रियाला ब्लॅकमेल करायला लागला. सोशल मीडियावर न्यूड व्हिडिओ टाकण्याची धमकी द्यायला लागला. या प्रकारामुळे रियाने जरीपटका पोलिस ठाण्यात धाव घेतली. पोलिसांनी गुन्हा नोंदविला आहे.