ईशारा देऊनही रेल्वे रुळावरून चालवत राहिले गाडी.. अन घडली अंगाचा थरकाप उडवणारी घटना 

रामटेक (जि.नागपूर) : मॅंगनिज भरण्यासाठी रामटेक रेल्वे स्टेशनकडून कांद्री माईनकडे जाणाऱ्या मालगाडीला धडकून कारचालकासह दोन जण जखमी झाले. रेल्वे कर्मचाऱ्यांनी दिलेल्या इशाऱ्यायाकडे दुर्लक्ष करून वाहनचालकाने वाहन पुढे नेण्याचा प्रयत्न केल्याने ही दुर्घटना घडली. जखमींना रुग्णालयात दाखल करण्यात आले आहे.

रामटेक तालुक्यात कांद्री माईन येथे मॅंगनिज खाण आहे. हे मॅंगनिज भरून आणण्यासाठी रामटेक रेल्वे स्टेशन ते कांद्री माईनपर्यंत स्वतंत्र रेल्वे रूळ टाकण्यात आले आहेत. ही व्यवस्था ब्रिटिश काळापासून आहे. रामटेक रेल्वे स्टेशनची निर्मितीच ब्रिटिशांनी मॅंगनिज नेण्यासाठी केली आहे. 

क्लिक करा - आयुक्त मुंढेच्या बदलीसाठी कोणी केला समझोता?, वाचा सविस्तर

गुरुवारी रात्री १२ च्या सुमारास रामटेक रेल्वे स्टेशनवरून कांद्री खाण येथे मॅंगनिज आणायला आठ डब्यांची मालगाडी निघाली. कैची माईननंतर हा रेल्वेमार्ग नागपूर-जबलपूर राष्टीय महामार्ग क्र.७ वरून जातो. त्याठिकाणी रेल्वे फाटक नाही. त्यामुळे मालगाडी महामार्गाजवळ पोहोचताच स्टेशन मास्टर मनिषकुमार, रेल्वे कर्मचारी शिवराज जयसिंग, चैतलाल बसिने, गॅंगमन धनराम यांनी महामार्गाच्या दोन्ही बाजूला वाहतुक रोखून धरण्यासाठी हातात टॉर्च घेऊन वाहनचालकांना इशारा देत होते.

दोन्हीकडची वाहकतूक रोखलेली असताना सिवनी (म.प्र.) कडून येत असलेल्या चारचाकी वाहनच्या चालकाने रेल्वे कर्मचाऱ्यांच्या इशाऱ्याकडे दुर्लक्ष करून आपले वाहन रूळांवरून नेण्याचा प्रयत्न केला. मात्र मालगाडीच्या शेवटच्या डब्यावर त्यांचे वाहन जोरात धडकले. त्यात वाहनचालक आणि त्याचा सहप्रवासी दोघेही जखमी झाले. लगेच अपघाताची माहिती रामटेक पोलिसांना देण्यात आली. पोलिस कर्मचारी संजय तिवारी, राजू भोयर, मनसर चौकीचे गजानन उकेबोंद्रे यांनी घटनास्थळ गाठून दोन्ही जखमींना रूग्णालयात पाठवले. वाहनचालकाविरूध्द गुन्हा दाखल करण्यात आला. अधिक तपास पोलिस हवालदार रावते करीत आहेत.

जाणून घ्या - रोजगार मिळावा म्हणून विकली वडिलोपार्जित शेती.. पण पैसे देताच बाहेर आले धक्कादायक सत्य; नक्की काय घडले

संपादन - अथर्व महांकाळ