MAYO Hospital : २४ तास प्रयोगशाळा, दररोज ५०० रुग्णांच्या चाचण्या ; मेयोत सर्जिकल विंगमध्ये सेंट्रल क्लिनिकल लॅब, रुग्णांना दिलासा

नागपूर : भारतीय वैद्यक परिषदेच्या निकषानुसार मेयो रुग्णालयात सुरू झालेली सेंट्रल क्लिनिकल लॅबोरेटरी (मध्यवर्ती प्रयोगशाळा) रुग्णांसाठी त्रासदायक ठरत होती. ही बाब ‘सकाळ’ने प्रकाशात आणल्यानंतर अधिष्ठाता डॉ. रवी चव्हाण यांनी पुढाकार घेत सर्जिकल विंगमध्ये ही प्रयोगशाळा उभारली. प्रयोगशाळा २४ तास उपलब्ध राहात असल्याने दररोज ५०० ते ७०० रुग्णांना लाभ मिळत आहे.

लॅब मेयोच्या बाह्यरुग्ण विभागात दुसऱ्या माळ्यावर प्रयोगशाळा होती. मात्र रुग्णांसाठी ती गैरसोयीची ठरत होती. या प्रयोगशाळेत सर्जिकल कॉम्प्लेक्समधून चाचणीसाठी नमुने पाठविताना पाऊण किलोमीटर जावे लागत होते. रात्री बाह्यरुग्ण विभाग बंद असल्याने अंधारही असायचा. ही बाब ‘सकाळ’ने प्रकाशित केल्यानंतर सर्जिकल कॉम्प्लेक्सच्या तळमजल्यावर ही प्रयोगशाळा हलविण्याचा निर्णय घेण्यात आला.

मेयोत ही प्रयोगशाळा तयार करताना भविष्याचा विचार न करता तात्पुरता विचार करण्यात आला. त्यामुळे नमुने घेऊन निवासी डॉक्टरांना चकरा माराव्या लागत होत्या. सर्जिकल कॉम्प्लेक्समध्ये प्रयोगशाळा आल्यानंतर हिस्टोपॅथॉलॉजीसह युरॉलॉजी व इतरही चाचण्या एकाच छताखाली होत आहेत. या प्रयोगशाळेमुळे रुग्णहित जोपासले जात आहे.

मेयोच्या आंतररुग्ण विभागात भरती रुग्ण आणि नियोजित शल्यक्रियांची गरज यानुसार रुग्णांच्या नियमित चाचण्या होत आहेत. बहुतांश चाचण्या रक्त, मुत्राशी निगडित असतात. ही प्रयोगशाळा सर्जिकल कॉम्प्लेक्सच्या तळमजल्यावरच स्थलांतरित झाल्याने रुग्णांना तत्काळ चाचण्यांचे अहवाल मिळतात.

- डॉ. रवी चव्हाण, अधिष्ठाता, मेयो.