गॅंगस्टर शेखु खानच्या भावाचा नागपुरात निघृण खून, गट्टूने केला वार

क्षुल्लक वादातून मोका आरोपी व गॅंगस्टर शेखु खान याचा भाऊ शारुज खान याचा काल रात्री साडेअकराच्या सुमारास निर्घृण खून करण्यात आला आहे. शहरातील शंकर नगर चौकात चार ते पाच जणांनी हातबुक्की आणि गट्टूने वार करत हा खून केला असल्याची माहिती मिळत आहे. या प्रकरणा संबंधित अधिकचा तपास पोलिस करत आहेत. (Crime News Nagpur)

मिळालेली माहिती अशी की, शारुज काल रात्री शंकरनगर पेट्रोल पंपावर आला होता. यावेळी विरुद्ध दिशेने येणाऱ्या ऑटो ने त्याच्या कारला धडक दिली. ऑटोरिक्षामध्ये बसलेल्या चार ते पाच युवकांनी त्याच्याशी वाद घातला. त्यांनी मिळून शारुजला बेदम मारहाण करण्यास सुरुवात केली. त्यात एकाने त्याच्या डोक्यावर गट्टूने वार करून शारुजला जखमी केले. दरम्यान, यातच त्यांचा मृत्यू झाला आहे. या घटनेची माहिती मिळताच बजाजनगर पोलिसांचा ताफा घटनास्थळी दाखल झाला. पोलिसांनी याप्रकरणी गुन्हा दाखल केला असून आरोपी अद्याप फरार आहेत.