अल्पवयीन मुलगी सहमत असली तरी तो बलात्काराच; नागपूर खंडपीठ

नागपूर - बलात्कार प्रकरणात (Rape Case) आरोपीला (Accused) अल्पवयीन मुलीने (Minor Girl) शरीरसंबंधास (Sexual Intercourse) दिलेल्या सहमतीला कायद्याच्या (Law) दृष्टिकोनातून अर्थ नाही, असा निर्वाळा मुंबई उच्च न्यायालयाच्या नागपूर खंडपीठाने (Nagpur Court) केला. पीर मोहम्मद घोटू मोहम्मद इस्माईल (२३) असे आरोपीचे नाव असून तो उत्तर प्रदेशमधील मूळ रहिवासी आहे. सत्र न्यायालयाने २२ ऑक्टोबर २०२१ रोजी जामीन अर्ज फेटाळल्यामुळे आरोपीने उच्च न्यायालयात (High Court) अपील दाखल केले होते.

या प्रकरणी न्यायमूर्ती विनय देशपांडे आणि न्यायमूर्ती अनुजा प्रभुदेसाई यांच्या समक्ष सुनावणी झाली. आरोपीविरुद्ध बुलढाणा जिल्ह्यातील लोणार तालुक्यातील बीबी पोलिसांनी अल्पवयीन मुलीवर बलात्कार, ॲट्रॉसिटी इत्यादी गुन्हे नोंदनों विले आहेत. आरोपी व पीडित मुलीचे एकमेकांवर प्रेम होते. मुलगी स्वत:हून आरोपीसोबत पळून गेली व तिने आरोपीसोबत स्वत:च्या सहमतीने शरीरसंबंध ठेवले, असे मुद्दे उच्च न्यायालयात मांडून जामीन मागण्यात आला होता. उच्च न्यायालयाने ते मुद्दे अमान्य केले.

कायद्याच्या दृष्टिकोनातून अल्पवयीन मुलीच्या सहमतीला काहीच अर्थ नाही. याशिवाय, मुलीने तिच्या बयाणामध्ये ती आरोपीवर प्रेम करते, असे कुठेही म्हटले नाही. आरोपीच तिच्यावर प्रेम करण्यासाठी दबाव टाकत होता. आरोपीने मुलीच्या लहान भावाला ठार मारण्याची धमकी दिली होती. त्यामुळे ती आरोपीसोबत पळून गेली. वैद्यकीय पुराव्यांवरून आरोपीने बलात्कार केल्याचे दिसून येते. याशिवाय सरकारच्या साक्षीदारांनीही आरोपीविरुद्ध बयाण दिले आहे. परिणामी, आरोपीला जामीन दिला जाऊ शकत नाही, असे न्यायालयाने हा निर्णय देताना नमूद केले.