पॉझिटिव्ह रुग्णांसाठी महापालिकेने दिली ही सुविधा, वाचा सविस्तर

नागपूर : शहरात अनेक कोरोनाबाधित घरांमध्येच असून त्यांना रुग्णालयात दाखल होण्याबाबत मार्गदर्शन करण्यासाठी महापालिकेने केंद्रीय कॉल सेंटर सुरू केले आहे. त्यामुळे रुग्णांना फोन करून रुग्णालयात दाखल होण्याबाबत मार्गदर्शन घेता येणार आहे. एवढेच नव्हे तर बेडच्या उपलब्धतेबाबत माहितीसाठीही स्वतंत्र फोन क्रमांक नागरिकांना उपलब्ध करून देण्यात आला आहे.
महानगरपालिकेचे आयुक्त राधाकृष्णन बी. यांनी गुरूवारी पाचपावली कोविड केअर सेंटर, पाचपावली नागरी प्राथमिक आरोग्य केंद्र आणि पाचपावली सुतीकागृहला आकस्मिक भेट दिली. यावेळी अतिरिक्त आयुक्त जलज शर्मा उपस्थित होते. कोविड केअर सेंटर, नागरी प्राथमिक आरोग्य केंद्र किंवा सूतिकागृहामध्ये चाचणी केल्यानंतर पॉझिटिव्ह अहवाल आलेल्या रुग्णांच्या संपर्कातील व्यक्तींचा शोध घेण्याची गरज आयुक्तांनी यावेळी व्यक्त केली.

कोरोनाबाधितांच्या अंत्यसंस्कारात वापरलेले साहित्य उघड्यावर; वाढला धोका

पॉझिटिव्ह व्यक्तींच्या संपर्कामध्ये आलेल्यांना शोधण्यासाठी तयार करण्यात आलेल्या ‘रॅपिड रिस्पॉन्स टिम’ने कार्यपद्धती वेगवान करावी, पॉझिटिव्ह व्यक्तींच्या संपर्कात आलेल्या ‘हाय रिस्क’ रुग्णांचे प्राधान्याने ‘कॉन्टॅक्ट ट्रेसिंग’ करून त्यांची लवकरात लवकर चाचणी केली जावी, असे निर्देश यावेळी आयुक्त राधाकृष्णन यांनी दिले.

या क्रमांकावर करा फोन
१) ०७१२-२५५२८६६
२) ०७१२-२५३२४७२
३) १८००२३३३७६४
४) ०७१२-२५६७०२१ (बेडच्या उपलब्धतेसाठी)

 
नागरिकांनी कोविड संदर्भातील कोणतीही लक्षणे दिसताच तसेच संपर्कातील एखादी व्यक्ती पॉझिटिव्ह आल्याचे लक्षात येताच स्वत:च जबाबदारीने मनपाच्या कोविड चाचणी केंद्रातून चाचणी करून घ्यावी. पॉझिटिव्ह रुग्णांमध्ये लक्षणे असल्यास त्यांना रुग्णालयात दाखल करण्यासाठी केंद्रीय कॉल सेंटरवर फोन करून मार्गदर्शन घ्यावे.
राधाकृष्णन बी., आयुक्त, महापालिका.