Kishori Pednekar : नार्वेकरांची स्क्रिप्ट आधीच ठरली होती; जनताच शिंदे सेनेला जागा दाखवेल - किशोरी पेडणेकर

Nagpur News : राज्यातील सत्ता संघर्षावर निकाल देताना विधानसभा अध्यक्ष राहुल नार्वेकर यांची स्क्रिप्ट आधीच ठरली होती. मात्र एक संहिता जनतेच्याही मनता असल्याचे सांगून शिवसेनेच्या नेत्या आणि माजी महापौर किशोरी पेडणेकर यांनी भाजप आणि शिंदे सेनेला इशारा दिला.

उद्धव बाळासाहेब ठाकरे सेनेच्यावतीने बुधवारी रामटेकमधून काढण्यात येणाऱ्या स्री संवाद यात्रेसाठी त्या नागपूरला आल्या होत्या. यावेळी त्यांनी पत्रकारांसोबत संवाद साधला. सत्तासंघर्षाचा निकाल उद्धव ठाकरे यांच्या विरोधात लागला म्हणून आम्ही विरोधात बोलत नाही. तो विरोधात कसा लावला गेला, हे सांगण्यासाठी आम्ही बाहेर पडलो आहोत.

चांदा ते बांदा आशी यात्रा काढण्यात येत आहे. देशाचा मध्यवर्ती ठिकाण नागपूर आहे. त्यामुळे आम्ही यात्रेसाठी नागपूरची निवड केली आहे. येथून आम्ही मुंबईपर्यंत पोहोचू. सगळ्या लोकसभाआणि विधानसभा मतदारसंघांमध्ये जाणार आहोत. महिलांचा जोश बघून तुम्हाला यात्रेची तयारी दिसलीच असेल, असेही पेडणेकर म्हणाल्या.

लोकसभेची निवडणूक महाविकास आघाडीतील सर्व घटकपक्ष एकत्रित लढणार आहेत. जागावाटप करणारे आमचे पक्षप्रमुख आहेत. त्यांचा फॉर्म्युला ठरेल तेव्हा तो समोर येणारच आहे. जागावाटपापेक्षा जे ज्या जागेवर आहेत त्यांना आम्हाला चालना द्यायची आहे.

जे निष्ठेने थांबले त्यांच्या सोबत संवाद साधणार आहोत. आम्हाला कोणाला जागा दाखवायची गरज नाही. त्यांना आता जनताच जागा दाखवणार आहे. आम्ही फक्त आमच्या बरोबर असलेल्या एनर्जीला हॉर्स पॉवर देण्याचे काम करतोय, असेही पेडणेकर यांनी सांगितले.