अल्पवयीन मुलीने घर सोडले, तिकीट विचारताच समोर आला प्रकार

नागपूर : कुटुंबीयांना कोणतीही माहिती न देता अल्पवयीन मुलीने घर सोडले. थेट स्थानक गाठून रेल्वेत जाऊन बसली. ही रेल्वे नागपूर स्थानकावर (nagpur railway station) पोहोचत असताना तिकीट तपासणी कर्मचाऱ्याचे तिच्याकडे लक्ष गेले. विचारणा केली असता तिच्याकडे तिकीटही नव्हते. संभाव्य धोके लक्षात घेता तिला ताब्यात घेण्यात आले. नातेवाइकांना मुलगी गवसल्याची माहिती देऊन तिला शासकीय बालगृहात ठेवण्यात आले आहे. (minor girl traveled without ticket in mumbai nagpur train)

तारुण्याच्या उंबरठ्यावर असणारी ही मुलगी १५ ते १६ वर्षे वयोगटातील आहे. तिच्या सांगण्याप्रमाणे ती मुंबईहून नागपूरकडे जाणाऱ्या दुरांतोमध्ये बसली. जवळ पैसे नसल्याने तिकीटही घेतली नाही. छिंदवाडा येथील नातेवाइकाकडे जात असल्याचे ती सांगते. पण, तिच्या आणि पालकांकडून मिळालेल्या माहितीत बरीच विसंगती आहे. यामुळे हे प्रकरण काहीसे संशयास्पदही आहे. मुलगी एकटीच प्रवास करीत असल्याने तिकीट तपासणी कर्मचारी तिच्याकडे लक्ष ठेवून होते. तिच्या हालचाली संशयास्पद जाणवत होत्या. पण, रात्रीचा प्रवास असल्याने ते शांत राहिले. सकाळी नागपूर स्थानकजवळ येत असताना त्यांनी मुलीकडे तिकीटची विचारणा केली. घाबरलेल्या अवस्थेत तिने तिकीट नसल्याचे सांगितले. कुठे जात आहे याबाबत ती योग्य माहिती देऊ शकत नव्हती. मुलगी एकाकी असल्याने त्यांनी तिला रेल्वे सुरक्षा दलाच्या ताब्यात दिले. आरपीएफ जवानांनी चौकशीसाठी तिला रेल्वे चाइल्ड लाईनच्या सुपूर्द केले. चाइल्ड लाईनच्या प्रतिनिधींनी तिला लोहमार्ग पोलिसांकडे दिले. पोलिसांनी कागदोपत्री कारवाईनंतर नियमाप्रमाणे तिला शासकीय मुलींच्या बालगृहात सुरक्षित पोहोचविले. तिच्या पालकांना मुलगी सापडल्याची माहिती देण्यात आली असून ते आल्यावरच बरीच माहिती स्पष्ट होई शकेल.