Nagpur Crime: ६ वर्षीय चिमुकलीवर ६१ वर्षीय नराधमाकडून लैंगिक अत्याचार, कोर्टाने सुनावली २० वर्ष तुरुंगवासाची शिक्षा

Court Sentenced 20 Years Jail to Physical Assaulters: सहा वर्षीय मुलीचे लैंगिक शोषण करणाऱ्या ६१ वर्षीय नराधम वृद्धास सत्र न्यायालयाने वीस वर्षे सश्रम कारावास, दहा हजार रूपये दंड व दंड न भरल्यास एक वर्षे अतिरिक्त कारावासाची शिक्षा सुनावली आहे. एडविन मायकल फ्रान्सिन (वय ५९, रा. सीमटाकळी) असे या आरोपीचे नाव आहे. त्याच्यावर एमआयडीसी पोलिस ठाण्यात गुन्हा दाखल होता.

न्यायाधीश आर. पी. पांडे यांनी हा निर्णय दिला. ही घटना ५ डिसेंबर २०२२ रोजी घडली होती. पीडित मुलगी आई, वडील व आजी सोबत भाड्याने राहत होती. आरोपी शेजारीच राहत असल्याने ओळख होती. पीडिता आरोपीला ‘बडेपापा’ नावाने हाक मारीत असे. काही कारणांस्तव आरोपीने ते घर सोडले व त्याच परिसरातील दुसरीकडे भाड्याने राहू लागला. (Latest Marathi News)

आई-वडील कामावर गेल्यावर मुलगी घरी आजीसोबत राहात असे. घटनेच्या दिवशी दुपारी १२ वाजताच्या सुमारास मुलगी चॉकलेट आणण्यासाठी जात होती. आरोपीने फ्रुटी घेऊन देतो, असे आमिष देऊन घरी घेऊन गेला व त्याने तिचे लैंगिक शोषण केले. पीडितेच्या आईने दिलेल्या तक्रारीच्या आधारावर पोलिसांनी गुन्हा दाखल केला. न्यायालयाने आरोपीला शिक्षा सुनावली. शासनातर्फे अतिरिक्त सरकारी वकील आसावरी परसोडकर यांनी बाजू मांडली.