Nagpur Crime : दारूच्या नशेत आधारकाठीने केला जन्मदात्या पित्याचा खून

नागपूर - दारूच्या आहारी गेलेल्या युवकाने वडिलांवर लोखंडी आधारकाठीने वार करीत त्यांचा खून केला. ही खळबळजनक घटना शनिवारी (ता.९) सायंकाळी साडेसात वाजताच्या सुमारास नंदनवन पोलिस हद्दीतील शक्तीमातानगरात घडली. पोलिसांनी आरोपी मुलाला अटक केली आहे.

कृष्णराव सदाशिव रायपूरकर (वय ७५) असे मृत वडिलांचे नाव असून अमित कृष्णराव रायपूरकर (वय ३७) असे आरोपी मुलाचे नाव आहे. कृष्णराव हे भूमीअभिलेख कार्यालयातून काही वर्षांपूर्वी सेवानिवृत्त झाले. काही दिवसांत त्यांच्या पत्नीचे निधन झाले. अमित एका कचऱ्याच्या गाडीवर वाहनचालक म्हणून काम करतो.

मात्र, त्याला दारूचे व्यसन असल्याने कामावर अनुपस्थित असतो. यातून वडिल व पत्नीशीही तो सातत्याने भांडण करायचा. यामुळेच त्याच्या पत्नीनेही त्याच्याशी चार महिन्यांपासून बोलणे बंद केले होते. त्यानंतरही अमित दररोज दारूच्या नशेत घरी यायचा.

शनिवारी सांयकाळी तो घरी दारू पिऊन आला आणि त्याने अर्चना यांना शिवीगाळ केली. कृष्णराव यांनी त्याला हटकले. अमितने कृष्णराव यांची आधारकाठी हिसकावली. त्यांच्यावर दोन वार केले. कृष्णराव खाली कोसळले. अर्चना यांनी आरडाओरड केली.

शेजाऱ्यांच्या मदतीने कृष्णराव यांना हॉस्पिटलमध्ये दाखल करण्यात आले. डॉक्टरांनी तपासून कृष्णराव यांना मृत घोषित केले.