ऑनलाइन सभेदरम्यान नगरसेवकाकडून सिगारेटचे झुरके

नागपूर : महापालिकेच्या ऑनलाइन सभेत विरोधी पक्षनेते तानाजी वनवे बोलत असतानाच त्यांच्याच पक्षाचे सदस्य रमेश पुणेकर सिगारेटचे झुरके मारताना आढळून आले. सायंकाळपर्यंत नगरसेवक पुणेकर यांच्या सिगारेटचे झुरके संपूर्ण शहरात पोहोचले. त्यामुळे महापालिकेच्या सभेत सहभागी होतानाही सदस्य गंभीर नसल्याची चर्चा रंगली आहे.

कचरा संकलन करणारी एजी एन्व्हायरो व बीव्हीजी इंडिया कंपनीचे कंत्राट रद्द करणे, नव्या कंपनीची नियुक्ती करणे यावर आज महापालिकेची विशेष सभा ऑनलाइन पार पडली. या सभेत महापौरांसह आयुक्त राधाकृष्णन बी., सर्वच अतिरिक्त आयुक्त, विविध विभागप्रमुख, गटनेते व सदस्य घरूनच ऑनलाइन पद्धतीने सहभागी झाले होते. सभेत विरोधी पक्षनेते तानाजी वनवे या कंपन्यांकडून होणारा अटीचा भंग, नियमाची पायमल्ली आदीवर बोलत होते. त्याचवेळी त्यांच्याच काँग्रेस पक्षाचे प्रभाग क्रमांक २० मधील नगरसेवक रमेश पुणेकर सिगारेट ओढताना स्क्रीनवर दिसून आले. पुणेकर सिगारेट ओढताना काही नगरसेवकांनी बघितले.

परंतु कुणीही सभेदरम्यान त्यांच्यावर ताशेरे ओढले नाही किंवा त्यांचे ते स्क्रीनवर दिसत असल्याकडे लक्ष वेधले नाही. या स्क्रीनवर महापौर व इतर दोन नगरसेवक दिसत आहेत. नेमके याच वेळेला कुणीतरी व्हिडिओ रेकॉर्डिंग केले. हे व्हिडिओ रेकॉर्डिंग सायंकाळपर्यंत अनेकांच्या मोबाईलवर दिसून आले.

महापालिकेची सभेसाठी उपस्थित राहताना धूम्रपान आदी न करण्याची अनेक वर्षांची परंपरा आहे. या परंपरेलाही पुणेकर यांच्या कृत्याने तडे गेले आहे. विशेष सभेत गंभीर विषयावर चर्चा केली जाते. विशेष सभेच्या गांभीर्यालाही धक्का बसला असून पुणेकर यांच्या वर्तनाने नगरसेवकांच्या प्रतिमेलाही तडा गेल्याची चर्चा यानिमित्त रंगली आहे.