Nagpur : हुबळी-धारवाडच्या महापौरांची मनपाला भेट

नागपूर : कर्नाटकमधील हुबळी-धारवाडचे महापौर इरेश बी. अंचतगेरी यांच्यासह तेथील आयुक्त गोपाळकृष्ण बी. यांनी गुरुवारी नागपूर महापालिकेला भेट दिली. आयुक्त राधाकृष्णन बी. यांनी दोघांचेही स्वागत केले. यावेळी पाहुण्यांनी स्मार्ट सिटीच्या श्रद्धेय अटल बिहारी वाजपेयी सिटी ऑपेरेशन सेंटरची पाहणी केली. गुन्हेगारीवर नियंत्रण तसेच पावसाळ्यात आपातकालीन स्थितीवर लक्ष ठेवण्याच्या प्रणालीचे त्यांनी कौतुक केले.

हुबळी-धारवाडचे महापौर इरेश बी. अंचतगेरी, आयुक्त गोपाळकृष्ण बी. यांनी सिटी ऑपरेशन सेंटरमधील गुन्हे नियंत्रणाबाबत माहिती जाणून घेतली. मनपा आयुक्त व प्रशासक राधाकृष्णन बी. आणि नागपूर स्मार्ट सिटीचे मुख्य कार्यकारी अधिकारी चिन्मय गोतमारे यांनी त्यांना विविध जनकल्याणकारी प्रकल्प व कामांची माहिती दिली. या सेंटरच्या माध्यमातून वाहतूक पोलिसांतर्फे वाहतूक नियमांचे उल्लंघन करणाऱ्या वाहनचालकांवर कारवाई केली जाते.

शहरात घडणाऱ्या गुन्ह्यांमध्ये तपासासाठी पोलिस प्रशासनाला सिटी ऑपरेशन सेंटरची मोठी मदत होत आहे. या सेंटरच्या माध्यमातून अनेक गुन्हेगारांना पकडण्यात पोलिसांना यश आले आहे. नागपूर स्मार्ट सिटीतर्फे शहरात ३६०० पेक्षा जास्त कॅमरे लावण्यात आले आहेत. या माध्यमातून गुन्हेगारीवर नियंत्रण ठेवले जाते तसेच पावसाळ्यात उद्भवणाऱ्या विविध समस्यांवर लक्ष ठेवण्यास सुद्धा मदत होते. महापौर इरेश बी. अंचतगेरी यांनी स्मार्ट सिटीच्या कॅमेऱ्यांच्या माध्यमातून गुन्हेगारीवर नियंत्रण ठेवणे आणि पावसाळ्यात कामे करण्याची प्रशंसा केली. याप्रसंगी अतिरिक्त आयुक्त राम जोशी, माहिती व तंत्रज्ञान विभागाचे प्रमुख महेश धामेचा, स्मार्ट सिटीचे डॉ. शील घुले, स्वप्नील लोखंडे, कुणाल गजभिये आदी उपस्थित होते