Nagpur Crime: उधारीचा वाद जीवावर बेतला; वारंवार टाळाटाळ करण्याचा महिलेचा खून, मृतदेह फेकला कन्हान नदीत

Nagpur Crime: जरीपटका पोलिस ठाण्याच्या हद्दीत महिलेचा खून करीत, मृतदेह नदीत फेकल्याची घटना मंगळवारी रात्री समोर आली. महिलेला दिलेल्या उधारीच्या पैशाच्या वादातून तिघांनी तिचा खून केल्याची माहिती समोर आली आहे.

शीतल उके (वय ४२, रा. बाराखोली) असे मृत महिलेचे नाव असून रोहित ऊर्फ सुनील शत्रुघ्न उसरबरसे (वय २१), आर्यन सीताराम महतो (वय १९, दोन्ही रा. माढा कॉलनी, भुसा कंपनी जवळ, कपिलनगर) अशी अटक आरोपींची नावे आहेत. याशिवाय एका अल्पवयीन मुलालाही पोलिसांनी ताब्यात घेतले.

पोलिसांनी दिलेल्या माहितीनुसार, शीतल प्रिन्स सर्फेस शॉप या दुकानात काम करायची. या दुकानाच्या परिसरात असलेल्या एका कंपनीमध्ये सुनील काम करायचा. तिथेच दोघांचीही ओळखी झाली. त्या ओळखीतून त्याने शीतल उके यांना काही महिन्यांपूर्वी त्याच्या ओळखीच्या दुकानातून ६५ हजारांच्‍या टाइल्सची खरेदी करून दिली होती. (Latest Marathi News)

दरम्यान, त्याचे पैसे तिने दिले नव्हते. दुकानदाराकडून या पैशाची सुनीलला मागणी होत होती. त्यामुळे त्याने शीतल यांच्याकडे पैशासाठी तगादा लावला होता. मात्र, ती पैसे देण्यासाठी टाळाटाळ करीत होती. याचा सुनीलच्या मनात राग होता. त्यातून त्याने शीतलचा गेम करण्याची योजना आखली.

यामध्ये मित्र, आर्यन आणि स्वतःच्या लहान भावास सोबत घेतले. २७ तारखेला सकाळी त्याने शीतलची भेट घेतली. तिच्यावर शस्त्राने वार करीत, खून केला. त्यानंतर तिचा मृतदेह बोरीमध्ये भरून तो आणि आर्यन दोघेही मोटारसायकलने रात्रीच्या सुमारास कन्हान नदीच्या पुलावर आले. तिथून त्याने मृतदेह नदीत फेकून दिला. (Latest Marathi News)

महिला घरी परत न आल्याने नातेवाइकांनी तिच्या मिसिंग ची तक्रार दाखल केली. पोलिसांनी त्याचा तपास केला असता, कॉल डिटेल्स आणि काहींच्या सांगण्यावरून मंगळवारी (ता.९) सुनील आणि आर्यनला ताब्यात घेतले. त्यांनी कबुली देताच, गुन्हा दाखल केला आणि अल्पवयीन मुलासही ताब्यात घेतले. यावेळी त्याला न्याय दंडाधिकारी न्यायालयासमोर सादर केले असता, दोघांचीही पाच दिवसाचा पोलिस कोठडीत रवानगी केली आहे.