कॉँग्रेस उमेदवार शोधून ठेवणार; महापालिका निवडणुकीची तयारी

नागपूर : वेळेवर शोधाशोध आणि कापाकापी करण्यापेक्षा काँग्रेसने आतापासून महापालिकेच्या निवडणुकीसाठी उमेदवार शोधून ठेवण्याचा निर्णय घेतला. प्रभाग रचनेचा आराखडा जाहीर झाल्यानंतर सामाजिक आणि राजकीय समीकरणे बघून उमेदवारी जाहीर करण्यात येईल.

महापालिकेच्या निवडणुकीसंदर्भात प्रदेशाध्यक्ष नाना पटोले यांनी गुरुवारी शहरातील प्रमुख पदाधिकाऱ्यांसोबत मुंबईत बैठक घेतली. बैठकीत शहर काँग्रेसचे अध्यक्ष आमदार विकास ठाकरे, प्रदेश महासचिव आमदार अभिजित वंजारी, उत्तर भारतीय सेलचे प्रदेशाध्यक्ष उमाकांत अग्निहोत्री, व्यापारी व उद्योग सेलचे अध्यक्ष अतुल कोटेचा, प्रदेश सचिव संजय महाकाळाकर आदी प्रामुख्याने उपस्थित होते.

मागील महापालिकेच्या निवडणुकीत काँग्रेसचा दारुण पराभव झाला होता. दीडशेंपैकी फक्त २९ उमेदवार निवडून आले होते. नेत्यांमधील अंतर्गत भांडणे, उमेदवारी वेळेवर जाहीर केल्याने उडालेला गोंधळ व त्यानंतर तत्कालीन प्रदेशाध्यक्षांवर झालेली शाईफेक याचा मोठा फटका काँग्रेसच्या उमेदवारांना बसला होता. विधानसभेच्या निवडणुकीत जिल्ह्यातील वर्चस्व काँग्रेसने मोडून काढले.

तत्पूर्वी, प्रभाग रचना, बूथ रचना, उमेदवारांची निवड यावरही चर्चा झाली. शहराचा प्रभागाचा आराखडा अद्याप जाहीर व्हायचा आहे. असे असले तरी आतापासून संघटनात्मक बांधणी आणि बूथ कमिट्या स्थापन करून कार्यकर्त्यांना निवडणुकीच्या कामाला लावावे असेही बैठकीत ठरले.

काँग्रेसला सत्ता स्थापन करण्याची संधी

राज्यात महाविकास आघाडीची सत्ता स्थापन झाली. भाजपविरोधात सर्वत्र असंतोष खदखदत आहे. त्यामुळे काँग्रेसला महापालिकेत सत्ता स्थापन करण्याची संधी आहे. मात्र, आपसातील भांडणांमुळे नुकसान होऊ नये याची दक्षता घेण्यात येणार आहे. बैठकीत निवडणूक कशी लढायची, जातीय व राजकीय समीकरण कसे ठरवायचे, सर्व नेत्यांच्या समर्थकांना उमेदवारी देऊन समतोल कसा साधायचा यावरही चर्चा झाली.