नागपूर : ‘ओपन’ च्या जागा कमी होणार | Sakal
sakal

बोलून बातमी शोधा

Nagpur municipal corporation

नागपूर : ‘ओपन’ च्या जागा कमी होणार

नागपूर : महापालिका निवडणुकीसाठी अनुसूचित जाती व जमातीचे आरक्षण कायम ठेवून उद्या, शुक्रवारी ओबीसी महिला व खुल्या गटासाठी आरक्षण काढण्यात येणार आहे. ओबीसींचे आरक्षण सर्वसाधारण महिला व खुल्या प्रवर्गातून काढण्यात येणार आहे. त्यामुळे सर्वसाधारण प्रवर्गाच्या यापूर्वी आरक्षित केलेल्या जागांमध्ये घट होणार आहे.

महापालिकेच्या सार्वत्रिक निवडणुकीसाठी उद्या, शुक्रवारी सकाळी ११ वाजता महाल येथील टाऊन हॉलमध्ये ओबीसी आरक्षणाची सोडत काढली जाणार आहे. सर्वोच्च न्यायालयाने सर्व निवडणूक ओबीसी आरक्षणासह घेण्याचे निर्देश दिल्यानंतर महापालिकेत महिलांसाठी राखीव सर्वसाधारण गटातील १८ जागा ओबीसी महिलांसाठी राखीव राहणार आहेत. याशिवाय खुल्या गटातून १७ जागा ओबीसींसाठी राहणार आहेत. निवडणूक आयोगाने ओबीसी आरक्षणाशिवायच आरक्षण काढत निवडणुकीची प्रक्रिया केली होती.

त्यानुसार महिलांच्या सर्वसाधारण प्रवर्गात ५६ तर खुल्या सर्वसाधारण प्रवर्गात ५७ जागा राखीव होत्या. त्यानुसार अनेकांनी अनुकूल गणिते मांडण्यास सुरुवात केली होती. आता ओबीसी आरक्षण खुल्या प्रवर्गातील जागांतूनच काढण्यात येणार आहे. आता ओबीसींसाठी महापालिकेला ३५ जागा आरक्षित कराव्या लागणार आहेत. महिलांच्या पन्नास टक्के आरक्षणानुसार महिलांच्या सर्वसाधारण प्रवर्गातील १८ जागा ओबीसी महिलांसाठी राखीव ठेवण्यात येणार आहे. सर्वसाधारण खुल्या प्रवर्गातील १७ जागा ओबीसींसाठी राखीव राहतील. त्यामुळे महिलांचा सर्वसाधारण गटाच्या ३८ जागा तर खुल्या सर्वसाधारण प्रवर्गाच्या ४० जागा शिल्लक राहणार आहेत.

ओबीसी आरक्षणाबाबत आयोगाचा कार्यक्रम

  • २९ जुलै : ओबीसी आरक्षणासाठी सोडत

  • ३० जुलै : प्रभागनिहाय आरक्षणाचे प्रारुप प्रसिद्ध करणे

  • ३० जुलै ते २ ऑगस्ट : आरक्षणावर हरकती व सूचना

  • ५ ऑगस्ट : अंतिम आरक्षण राजपत्रात प्रसिद्ध करणे

Web Title: Nagpur Municipal Elections Open Seats Reservation Decrease Obc Reservation

Read Latest Marathi News Headlines of Maharashtra, Live Marathi News of Mumbai, Pune, Politics, Finance, Entertainment, Sports, Jobs, Lifestyle at Sakal. To Get Updates on Mobile, Download the Sakal Mobile App for Android & iOS.
सकाळ आता सर्व सोशल मीडिया प्लॅटफॉर्मवर. ताज्या घडामोडींसाठी टेलिग्राम, फेसबुक, ट्विटर, शेअर चॅट आणि इन्स्टाग्रामवर आम्हाला फॉलो करा तसेच, आमच्या YouTube Channel आजच Subscribe करा..