नागपूर : मुबलक जलसाठा, तरीही 'रामटेक' तहानलेले

रामटेक : महाराष्ट्र जीवन प्राधिकरण योजनेअंतर्गत नवीन पाणीपुरवठा करण्याकरिता पाइपलाइनचे काम कासवगतीने सुरू आहे. मागील दोन वर्षांपासून रस्ते खोदून पाइप टाकण्याचे काम आजही सुरू आहे, परंतु योजनेचे काम अपूर्ण असून राजकीय फायदा घेण्याच्या उद्देशाने लोकार्पण सुद्धा झाले आहे. लोकांना जुन्या पाइपलाइनद्वारेच पिण्याच्या पाण्याची सोय होत आहे, तीही अपुरी. काही ठिकाणी तर दोन दिवसाआड पाणी पुरवले जाते. त्यामुळे रामटेक शहरात खिंडसी जलाशयाचा मोठा साठा असूनही नगर परिषदेच्या चुकीच्या नियोजनामुळे लोकांना पाणी मिळत नसल्याची चित्र दिसत आहे.

नवीन पाइपलाईन ही काही ठिकाणी ‘ट्रायल बेसिक’ वर सुरू करण्यात आली असल्यामुळे त्याचे कनेक्शन हे सध्या घरातील पाइपला मग जोडल्यामुळे त्याचे पाणी रस्त्यावर वाहत आहे. त्यामुळे लोकांना पिण्याला पाणी नाही. रस्त्यावर लोट वाहत असल्याचे चित्र काही ठिकाणी दिसून येत आहे. त्यामुळे नागरिकांना संताप वाढत चालला आहे. माजी नगरसेवक सुमीत कोठारी यांनी जनतेची अडचण लक्षात घेऊन आमदारांच्या मदतीने ज्या ठिकाणी पाणी मिळत नसेल, त्या ठिकाणी पाणी टँकरद्वारे पुरविण्याचे काम सुरू केले आहे.

आज रामटेक शहरातील भगतसिंग व आंबेडकर वार्डातील काही महिलांनी आमदार आशीष जयस्वाल यांच्याकडे तक्रार केली. त्यांचे म्हणणे असे की, दोन ते तीन दिवसांपासून त्यांच्या वार्डात पाणी येत नाही. घरातील कामांकरिता काहीच पाणी उपलब्ध नाही. आमदार जयस्वाल यांनी तूर्त फोन करून दोन्ही वार्डात पाण्याची व्यवस्था करायला सांगितले. आम्ही दोन्ही वार्डात पंधरा मिनिटात पाण्याची व्यवस्था करून दिली. रामटेक शहरातील कोणत्याही वार्डा पाण्याची समस्या असेल तर आम्हाला फोन करा, आम्ही त्याची समस्या सोडविण्याचा प्रयत्न करू. रामटेक शहरात पाणी मोठ्या प्रमाणात उपलब्ध आहे. लोकांचे टिल्लू पंप बंद करण्यात यावे व प्रशासन पाणीचा नियोजन व्यवस्थितपणे करण्याची गरज आहे.

-सुमीत कोठारी, माजी नगरसेवक