नागपूर : दगडाने ठेचून युवकाची हत्या

टाकळघाट : एमआयडीसी बुटीबोरी परिसरातील टाकळघाट मार्गावरील इंडोरामा गेट नं. ७ उमरी शिवार येथे एका अनोळखी व्यक्तीने दगडाने ठेचून युवकाची हत्या केल्याची घटना गुरुवारी पहाटे एमआयडीसी बुटीबोरी पोलिसांच्या हद्दीत घडली.

मृत युवकाचे नाव आकाश रमेश फेंडर(२२, घारफड, ता.बाभूळगाव, जि. यवतमाळ, हल्ली मुक्काम गणेशपूर, ता.हिंगणा)असे असून तो घर बांधकाम करण्याचे काम या परिसरात करायचा. सविस्तर वृत्त असे की, इंडोरामा कंपनी गेट क्र.७ जवळ टाकळघाट मार्गावरील एका नालीला लागून मृतदेह पडून असल्याची माहिती एमआयडीसी पोलिसांना कळली. त्यावरून पोलिस निरीक्षक कोळी यांच्या मार्गदर्शनात पोलिस ताफा घटनास्थळी पोहचल्यावर एक युवकाचा अज्ञात व्यक्तीने अज्ञात कारणावरून त्याचे दगडाने तोंड ठेचून हत्या केल्याचे दिसून आले.

तसेच मृताच्या हातावर आकाश नावाचे गोंदण असल्याने व एक कागदावर मोबाईल क्रमांक लिहिलेली चिठ्ठी मिळून आल्याने ती हत्या आकाश फेंडरची असल्याची निष्पन्न झाले. पंचनामा करून मृतदेह शवविच्छेदनाकरिता नागपूर रवाना केला. घटनेचा तपास एमआयडीसी पोलिस ठाण्याचे निरीक्षक अशोक कोळी, भाष्कर मेटकर, डी.बी.पथक करीत असून आरोपीचा शोध घेत आहे. घटनेचे गांभीर्य लक्षात घेत उपविभागिय पोलिस अधिकारी पूजा गायकवाड यांनी भेट दिली. घटनेचा सखोल तपास करण्याचे निर्देश दिले. एमआयडीसी पोलिसांनी श्वान पथक, फिंगर प्रिंट एक्सपर्ट यांना पाचारण केले.