Success Story : जिद्दीचे पंख लाऊन स्वप्नाचा केला पाठलाग; भारतीय सैन्यात निवड

बुटीबोरी (जि. नागपूर) : बुटीबोरीच्या शिरपेचात अजून एक मानाचा तुरा रोवणाऱ्या विक्की दांडेकर यांची भारतीय सैन्य दल जम्मू काश्मीर येथे निवड झाली. जम्मू-काश्मीर येथे देशसेवा करण्यासाठी पूर्णतः सज्ज झालेल्या विक्कीचा मंगळवारी बुटीबोरीतील बालभारती मैदानावर प्रदेश काँग्रेस कमिटीचे सचिव मुजीब पठाण यांच्या हस्ते सत्कार करण्यात आला.

अनेक तरुण आपले स्वप्न रंगवून त्या स्वप्नाचा पाठलाग करीत असतात. स्वप्नपूर्ती झाल्यानंतर मिळणारा आनंद हा अतिशय देखणा असतो. याचे दृश्य रूप आज बुटीबोरीमधील बालभारती मैदानावर पाहायला मिळाले. बुटीबोरी प्रभाग क्र.५ मध्ये राहणाऱ्या २३ वर्षीय विक्की वामनराव दांडेकर यांची परिस्थिती अत्यंत हालाखीची असून देशाकरीता काही तरी विशेष करण्याची त्याने स्वप्ने रंगविली होती. २०१५ मध्ये बारावीची परीक्षा उत्तीर्ण झाल्यावर पोलिस भरतीची तयारी करू लागला.

अधिक वाचा - पत्नीच्या अनैतिक संबंधातून सेवानिवृत्त जवानाचा खून; पती लवकर घरी आल्याने घडला थरार

दिवसरात्र मेहनत करून २०१९ ला विक्की बुटीबोरी पोलिस ठाण्यात होमगार्ड म्हणून कार्यरत झाला. परंतु त्याची स्वप्न भारतीय सैन्य दलात दाखल होण्याची होती. आपल्या स्वप्नाचा पाठलाग करीत असताना २२ मार्च २०२१ ला अखेर विकीचे स्वप्न साकार झाले. विक्कीची भारतीय सैन्य दल जम्मू काश्मीर येथे निवड झाल्याचे नियुक्तीपत्र हाती येताच दांडेकर कुटुंबीयात आनंदाचे वातावरण निर्माण झाले. 

सरावातून यश संपादन करता येते
मैदानावर पोलिस भरतीची तयारी करत असताना डोळ्यांसमोर उद्दिष्ट व कुटुंबीयांचे स्वप्न साकार करण्याच्या उद्देशाने मी तयारी करीत होतो. कमी वेळात अधिक तयारी कसी करता येईल याकडे अधिक लक्ष केंद्रित करणे गरजेचे आहे. सरावातून यश संपादन करता येते, मात्र त्याकरिता सरावाची नियमित वेळ ठरवून त्यात सातत्य टिकवून ठेवणे गरजेचे आहे. 
- विक्की वामनराव दांडेकर, सैनिक