Nagpur Crime : विवस्त्र युवक बिनधास्त फिरला दुचाकीवर; पोलिसांनी केला गुन्हा दाखल

नागपूर - विवस्त्र होऊन दुचाकी चालवित शुक्रवारी मध्यरात्री अडीच वाजताच्या सुमारास शहरभर फिरणाऱ्या एका ३५ वर्षीय युवकाला प्रतापनगर पोलिसांनी अटक करीत गुन्हा दाखल केला. दरम्यान त्याचा व्हिडीओ शनिवारी (ता.१३) सकाळी व्हायरल झाल्याने शहरात खळबळ उडाली.

प्रितमकुमार बोधले ( रा. प्रतापनगर) असे या युवकाचे नाव आहे. पोलिसांनी दिलेल्या माहितीनुसार, प्रितमकुमार विवस्त्र आपल्या दुचाकीवर मध्यरात्री अडीच वाजताच्या सुमारास खामला चौकातून प्रतापनगरकडे निघाला. तो विवस्त्र होऊन दुचाकी चालवित असल्याचे काहींनी बघितले. दरम्यान ही माहिती बीट मार्शलला मिळाली. बीट मार्शलने त्याचा पाठलाग करीत, जयताळा चौकात थाबंवून ताब्यात घेतले.

त्याने असे का केले? याबाबत तो काहीच सांगत नसल्याने त्याला ठाण्यात नेऊन त्याच्यावर गुन्हा दाखल केला. प्रितम वेडसर असल्याची माहिती कुटुंबीयांनी दिली. अनेकदा त्याने अशाच प्रकारे घरातून निघून गेला असल्याची माहिती दिली. त्याचे स्वतःवर नियंत्रण राहात नसून त्याच्यावर मानसोपचार तज्ज्ञाकडून उपचार सुरू असल्याचेही नातेवाईकांनी सांगितले.