माता नव्हे तू वैरीणी; बाळावर पुलावरून फेकून काढला पळ

नागपूर : प्रेमसंबंध किंवा अनैतिक संबंधातून राहिलेल्या गर्भामुळे जन्मास आलेल्या बाळाची लपवणूक करण्यासाठी निष्ठुर मातेने जन्म होताच बाळाला नाल्यात फेकून पळ काढला. त्यामुळे त्या बाळाचा मृत्यू झाला असावा. या घटनेमुळे एकच खळबळ उडाली. ही घटना सोमवारी सायंकाळच्या सुमारास वाठोड्यात उघडकीस आली. या प्रकरणी बाळाला सोडून पलायन करणाऱ्या आईविरुद्ध वाठोडा पोलिसांनी गुन्हा दाखल केला आहे.

नवजात शिशूचा जन्म लपविण्यासाठी निर्दयी मातेने पंतप्रधान आवास योजनेसमोर असलेल्या नाल्यात शिशूला फेकले. या नाल्याच्या शेजारी शुभांगी देशमुख या महिलेची चहा टपरी व पानठेला आहे. सोमवारी सायंकाळी शुभांगी नाल्याच्या काठावर लघुशंकेसाठी गेली असता नाल्यातील पाण्यात काहीतरी गुंडाळलेले दिसले. उत्सुकतेपोटी त्यांनी जवळ जाऊन पाहिले असता नवजात अर्भक मृतावस्थेत असल्याचे दिसले.

त्यांनी पोलिसांना फोन करून घटनेबाबत माहिती दिली. वाठोडा ठाण्याचे पथक घटनास्थळावर पोहोचले व मृत अर्भकाला ताब्यात घेतले. यानंतर उत्तरीय तपासणीसाठी शासकीय रुग्णालयात रवाना केले. याप्रकरणी पोलिसांनी अज्ञात मातेविरुद्ध गुन्हा दाखल करून शोध घेणे सुरू केला आहे. याप्रकरणी वाठोडा पोलिसांनी निर्दयी मातेवर गुन्हा दाखल केला आहे.

अशीही चर्चा

वाठोडा परिसरातील युवतीला अनैतिक संबंधातून गर्भधारणा झाली होती. अपत्याचा जन्म झाल्याबरोबरच युवतीच्या नातेवाइकांनी बाळाला पुलावरून नाल्यात फेकून पळ काढला, अशी कुजबुज परिसरातील नागरिकात सुरू होती. पुढील तपास पोलिस करीत आहेत. या रस्त्याकडे जाणाऱ्या रस्त्यावरील सीसीटीव्ही फुटेज पोलिस तपासत आहेत.