नागपूर : महापालिकेच्या आर्थिक संकटामुळे आयुक्त तुकाराम मुंढे यांनी सर्वच कामे रोखली. रिझर्व्ह बॅंकेने येस बॅंकेवर लावलेल्या निर्बंधामुळे महापालिकेचा पाय आणखी खोलात गेला. विविध विभागांकडून दररोज वसूल केला जाणार निधी येस बॅंकेत जमा केला जात होता. येस बॅंकेत महापालिकेचे 95 कोटी जमा असून, तूर्तास तरी हा निधी अडकल्याने महापालिकेच्या आर्थिक संकटात आणखी भर पडणार आहे.
येस बॅंकेत आर्थिक अनियमितता पुढे आल्याने रिझर्व्ह बॅंकेने व्यवहारावर निर्बंध आणले आहेत. त्यामुळे लाखो खातेधारकांना मनस्ताप सहन करावा लागत आहे. यात आता नागपूर महापालिकेचीही भर पडली. आधी आर्थिक संकटाशी झुंज देत असलेल्या महापालिकेतील विविध विभागांकडून दररोज वसूल केली जाणारी रक्कम येस बॅंकेत जमा केली जात होती. ही एकूण रक्कम 95 कोटींच्या घरात असल्याचे सूत्राने नमूद केले. हा निधी परत मिळविण्यासाठी आता महापालिका प्रशासनाला चांगलीच कसरत करावी लागणार आहे. महापालिकेच्या एक ते पाच झोनमधील मालमत्ता कर विभागासह बाजार विभागाकडून दररोज वसूल केला जाणारा निधी येस बॅंकेत जमा केला जात होता. यासाठी येस बॅंक व महापालिकेत करार झाला होता. दररोजचा निधी येस बॅंकेचे कर्मचारी बॅंकेत जमा करीत होते. तीन दिवसांनंतर हा निधी महापालिकेचे खाते असलेल्या बॅंक ऑफ महाराष्ट्रमध्ये जमा करण्याची अट महापालिकेने ठेवली होती. येस बॅंकेवर निर्बंध लागण्यापूर्वी नियमित बॅंक ऑफ महाराष्ट्रमध्ये पैसा जमा झाला. परंतु, निर्बंध लागल्यानंतर महापालिकेचा हा निधी रखडला. आयुक्त तुकाराम मुंढे यांनी महापालिकेच्या आर्थिक शिस्तीवर नुकतेच बोट ठेवले. कुठल्याही शासकीय संस्थेचा निधी राष्ट्रीयीकृत बॅंकेत जमा करणे बंधनकारक आहे. महापालिकेचे खातेही बॅंक ऑफ महाराष्ट्रमध्ये आहे. असे असतानाही येस बॅंकेत खाते काढण्याची दुर्बुद्धी महापालिकेला सुचलीच कशी, याबाबत आश्‍चर्य व्यक्त केले जात आहे.
स्मार्ट सिटीचा निधी बचावला
नागपूर स्मार्ट ऍण्ड सस्टेनेबल सिटी डेव्हलपमेंट कॉर्पोरेशनला केंद्र व राज्य सरकारकडून मिळालेला निधी येस बॅंकेत जमा करावा, अशी गळ येस बॅंकेच्या प्रतिनिधींनी स्मार्ट सिटी मुख्य कार्यकारी अधिकाऱ्यांना केली होती. मात्र, तत्कालीन मुख्य कार्यकारी अधिकारी डॉ. रामनाथ सोनवणे यांनी येस बॅंकेचा प्रस्ताव धुडकावून लावला. त्यामुळे स्मार्ट सिटीचे जवळपास साडेतीनशे कोटी रुपये बचावले.
येस बॅंकेच्या प्रस्तावाला मंजुरी कुणाची?
महापालिकेच्या पाच झोनमधील दररोज वसुलीचा पैसा जमा करण्याबाबत येस बॅंकेसोबत करार करण्यात आला. येस बॅंकेच्या प्रतिनिधींसोबत महापालिकेच्या कुठल्या अधिकाऱ्यांनी "डील' केली. या बॅंकेच्या प्रस्तावाला कुणी मंजुरी दिली, याबाबत आता चर्चा रंगली आहे.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.