नागपूर : दीड किमीपर्यंत पिलकापर जंगल आगीच्या भक्ष्यस्थानी

मोहपा - जिल्ह्याच्या नकाशात पिलकापार टेकड्या व सीताफळीचे जंगल म्हणून प्रसिद्ध असलेले हे जंगल सोमवारी सकाळी ११ ते रात्री ८ वाजेपर्यंत आगीत जळून राख झाले. मोहपा येथून सात किलोमीटर अंतरावर बुधला या गावाजवळ हे जंगल आहे. आग विझविण्यास वनविभाग सपशेल अपयशी ठरला. सोमवारी सकाळी जंगलात लागलेली आग नैसर्गिकरित्या रात्री विझली, पण आग कशी लागली, याचे कारण मात्र गुलदस्त्यात आहे. समजविघातक घटकाद्वारे सुद्धा आग लावली असू शकते किंवा कुणी शिकारी असलेल्या घटकाद्वारे सुद्धा आग लावली जाऊ शकते, अशी चर्चा परिसरातील नागरिकांत आहे.

जंगलातून ज्या ठिकाणाहून गुरे किंवा गुराखी जातात अशा रस्त्यावर झाडें नसल्यामुळे जंगलात लागलेली आग विझली. या आगीत अनेक मोठमोठे वृक्ष, सीताफळीचे वृक्ष, अनेक औषधी वनस्पती आगीत जाळून राख झाले. लागलेल्या आगीमुळे जंगलातील पशुपक्ष्यानी जंगलाशेजारी असलेल्या मांडवी गावातील शेतांमध्ये आश्रय घेतला. यामध्ये अंदाजे २०० नीलगायी, २५० रानडुक्करे, अनेक हरीण, एक बिबट, अनेक ससे व बरेचशे विविध प्रजातीचे पक्षी मांडवी शिवारातील शेतकऱ्यांचे अतोनात नुकसान करत आहेत. यापुढेही अनेक शेतकऱ्यांचे नुकसान होण्याची शक्यता आहे. आग विझविण्यासाठी वनविभागाजवळ पुरेसे तंत्रज्ञान उपलब्ध नाहीच व स्थायी मनुष्यबळ सुद्धा नाही. आग विझविण्यासाठी फक्त चार कॉम्प्रेसर मशीन उपलब्ध होत्या व त्या मशिन्स कंत्राटी सुरक्षा रक्षकाद्वारे हाताळण्यात आल्या, पण त्याचा काहीही फायदा झाला नाही. पर्यवारणाचे बिघडलेले संतुलन फक्त जंगलामुळेच व्यवस्थित होऊ शकते. पण वनांच्या संरक्षणासाठी वनविभाग किती जागरूक आहे, हे या घटनेवरून दिसून येते. वनविभागाच्या कर्मचाऱ्याशी दूरध्वनीद्वारे संपर्क केला असता प्रतिसाद मिळाला नाही.