Nagpur News : विभागीय शिक्षण उपसंचालक उल्हास नरड यांचे निलंबन होईना; आयुक्तालयाच्या भूमिकेवर संशय

नागपूर - बनावट शालार्थ आयडी प्रकरणात सदर पोलिसांकडून अटक केल्यानंतर चार दिवस पोलिस कोठडीत असलेले विभागीय शिक्षण उपसंचालक उल्हास नरड यांच्यासह इतर चार आरोपींच्या निलंबनाच्या प्रस्ताव अद्यापही आयुक्तालयात गेला नसल्याची धक्कादायक माहिती समोर आली आहे.

आयुक्तांकडूनही याबाबत हालचाली सुरू नसल्याने संपूर्ण शिक्षण विभागाची भूमिका आता संशयाच्या भोवऱ्यात आली आहे. सध्या उल्हास नरड आणि लिपिक सूरज नाईक हे सायबर पोलिसांच्या ताब्यात आहेत.

सदर पोलिसांनी ११ एप्रिलला उल्हास नरड यांना गडचिरोलीतून अटक केली. त्यानंतर दुसऱ्या दिवशी माध्यमिक विभागातील बनावट कागदपत्राच्या आधारे पराग पुडके याला शिक्षकाची नियुक्ती देणारा नीलेश मेश्राम, उपसंचालक कार्यालयातील संजय दुधाळकर आणि सूरज नाईक यांनाही अटक केली.

पाचही जणांना पोलिस कोठडीत ठेवण्यात आले. नियमानुसार ४८ तासाची कोठडी मिळाल्यावर त्याच्या निलंबनाचा प्रस्ताव उपसंचालक कार्यालयामार्फत विभागाकडे पाठविण्यात येतो. त्यानंतर त्यांच्यावर निलंबनाची कारवाई करण्यात येते.

मात्र, नरड यांच्या अटकेपासून आज आठ दिवसाचा कालावधी झाल्यावरही त्यांच्या निलंबनाचा प्रस्ताव अद्याप तयार नसल्याचे दिसून येते. त्यामुळे नरड यांना वाचविण्यासाठी शिक्षण विभागातून प्रयत्न होत आहेत काय? असा संशय आता शैक्षणिक वर्तुळात चर्चेचा विषय ठरत आहे.

आयुक्त कार्यालयाचे मौन

शिक्षण विभागातील शालार्थ आयडी घोटाळ्यात अनेकांची नावे समोर येत आहे. मात्र, या संपूर्ण शैक्षणिक घोटाळ्याबाबत आयुक्तालयाचे कमालिचे मौन असल्याचे दिसून येते. इतक्या मोठ्या प्रमाणात आर्थिक व्यवहार होत असल्याचे समोर येत असताना, त्याबाबत ‘एसआयटी’ लावण्याची मागणी शिक्षण संघटनांकडून करण्यात येत आहे. त्यानंतरही त्याबाबत कुठल्याही पद्धतीचे पाऊल विभाग उचलत नाही अशी टीका संघटनांकडून होत आहे.

नागपूर विभागातील बोगस शिक्षक भरती व शालार्थ आयडी घोटाळ्यामध्ये अटकेत असलेले शिक्षण उपसंचालक उल्हास नरड आणि शिक्षणाधिकारी कार्यालयातील अधीक्षक निलेश मेश्राम व अन्य कर्मचाऱ्यांचे अटक होऊन आठ दिवस झाले असतानाही निलंबन का नाही? याबाबत शिक्षण क्षेत्रात आश्चर्य व्यक्त केले जात आहे.

- पुरुषोत्तम पंचभाई, मार्गदर्शक, महाराष्ट्र माध्यमिक शिक्षक महासंघ.