चित्रपटातील हिरो खऱ्या आयुष्यात खलनायक! मोबाईल चोरीत अडकला

नागपूर : नशिबाने त्याला चक्क एका चित्रपटात कामाची संधी मिळवून दिली. दिग्गज अभिनेत्यासोबत त्याने काम केले. त्याच्यामुळेच फुटबॉलचा सामना जिंकता आल्याचा प्रसंग चित्रित करण्यात आला आहे. मात्र, चित्रपट प्रदर्शित होण्यापूर्वीच मोबाईल चोरीच्या (Mobile theft) प्रकरणात त्याला अटक झाली आणि चित्रपटातील हा हिरो (The hero in the movie) खऱ्या आयुष्यात मात्र खलनायक (A villain in real life) ठरला. लोहमार्ग पोलिसांनी अटक केलेल्या प्रियांशू क्षेत्रीचा खरा चेहरा समोर आला आहे. (The-hero-in-the-movie-is-a-villain-in-real-life)

ख्रिश्चन कॉलनीतील रहिवासी आणि उत्कृष्ट फुटबॉलपटू प्रियाशू मित्रांमध्ये बाबू नावानेच ओळखला जातो. आई-वडिलांना तो एकटा मुलगा असून, तीन बहिणी आहे. अलिकडेच नागपुरात चित्रित झालेल्या बहुप्रतीक्षित चित्रपटात त्याला कामाची संधी मिळाली. या कामाचे मानधनही त्याला मिळाले. पण, वाईट संगतीमुळे तो व्यसनाधीन झाला. शौक पूर्ण करण्यासाठी चक्क रेल्वेत मोबाईल चोरी करू लागला.

रेल्वे स्थानकावरून रवाना होणाऱ्या गाड्यांची गती आउटरवर कमी असते. अनेक प्रवासी गेटजवळ उभे राहून नातेवाइकांना गाडी सुरू झाल्याची वार्ता देत असतात. त्याचवेळी प्रियांशू हाती काठी घेऊन उभा असायचा. बोलणाऱ्याच्या हातावर काठी हाणून मोबाईल खाली पाडायचा आणि तो पळवून न्यायचा अशी त्याची कार्यपद्धती.

सत्येंद्र नावाचा साथीदार पडलेल्या मोबाईलवर लक्ष ठेवायचा. चोरलेले मोबाईल ते शुभमकडे जमा करायचे. ग्राहक शोधायची जबाबदारी शुभमकडेच होती. तिन्ही चोरट्यांना पोलिसांनी अटक केली असून न्यायालयाच्या आदेशाने त्यांना ५ जुलैपर्यंत पोलिस कोठडीत ठेवण्यात आले आहे.

(The-hero-in-the-movie-is-a-villain-in-real-life)