Congress MLA Raju Parwe: दोन दिवसांपूर्वी रात्री उशिरा फडणवीसांची भेट; आज शिवसेनेत प्रवेशाच्या चर्चा, काँग्रेसचे आमदार राजू पारवे शिवसेनेच्या वाटेवर?

Congress MLA Raju Parwe: लोकसभा निवडणुका जाहीर झाल्यानंतर आता उमेदवारीवरून अनेक मतदारसंघात नाराजीनाट्य दिसून येत आहेत. अशातच अनेक नेते निवडणुकीच्या पार्श्वभूमीवर पक्षांतर करत आहेत. काँग्रेस, शिवसेना ठाकरे गट, शरद पवार गट यांच्या पक्षातून अनेक नेते भाजपमध्ये जाताना दिसत आहेत. अशातच नागपूरमधील उमरेडचे काँग्रेसचे आमदार राजू पारवे आज शिवसेना शिंदे गटात किंवा भाजपमध्ये प्रवेश करण्याच्या चर्चा राजकीय वर्तुळात सुरू आहेत. राजू पारवे शिवसेनेतून निवडणूक लढवण्याची शक्यता आहे. रामटेकची जागा शिवसेनेकडे जाणार असल्याचं बोललं जात आहे.

तर ही जागा भाजपला सुटली तर काँग्रेसचे आमदार राजू पारवे हे भाजपचा चेहरा ठरतील की शिंदे गटाचा उमेदवार ठरतील अशी चर्चा राजकीय वर्तुळात सुरू आहे. राजू पारवे यांनी गुरुवारी उशिरा रात्री उपमुख्यमंत्री देवेंद्र फडणवीस यांची भेट घेतली होती. पारवे भाजपमध्ये जाणार आणि त्यांना भाजपकडून रामटेक लोकसभेची उमेदवारी दिली जाणार, अशी चर्चा राजकीय वर्तुळात अनेक दिवसांपासून सुरू आहे. याच पार्श्वभूमीवर फडणवीस आणि पारवे यांची भेट महत्त्वाची आहे.

राजू पारवे आज शिवसेना शिंदे गटात प्रवेश करण्याची शक्यता

राजकीय वर्तुळात अनेक तर्क वितर्क लावले जात असताना राजू पारवे आज शिवसेनेत प्रवेश करणार करणार असल्याचं बोललं जात आहे. पारवे धनुष्यबाण चिन्हावर निवडणूक लढवण्याची शक्यता आहे. रामटेक हा मतदार संघ अनुसूचित जाती साठी राखीव आहे.

सध्या या ठिकाणी शिवसेनेचे कृपाल तुमाने खासदार आहेत. महायुतीच्या जागा वाटपात भाजपला ही जागा हवी आहे. मात्र, याबाबत अद्याप निर्णय झालेला नाही. दरम्यान राजू पारवे कोणत्या पक्षात जाणार हे पाहणंही महत्त्वाचं ठरणार आहे.