पदवी प्रवेश प्रक्रियेला होतोय विरोध, काय असावी कारणे...

नागपूर  : देशात कोरोनाचा प्रादुर्भाव वाढला असल्यामुळे टाळेबंदी लावण्यात आलेली आहे. त्यामुळे विद्यापीठात शिकणारे विद्यार्थी सध्या ग्रामीण भागात आहेत. या विद्यार्थ्यांची आर्थिक परिस्थिती अत्यंत वाईट असून शहरासह ग्रामीण भागात इंटरनेट कनेक्‍टिव्हीटी चांगली नसल्याने पदवी प्रवेश ऑफलाइन करावे अशी मागणी सिनेट सदस्य ऍड. मनमोहन वाजपेयी यांचेसह इतर सदस्यांनी केली आहे.

कोरोनाच्या प्रादुभावामुळे महाविद्यालये बंद करण्यात आली. सध्या महाविद्यालयासह विद्यापीठात 15 टक्के कर्मचाऱ्यांच्या भरोश्‍यावर कामे सुरू आहेत. विद्यापीठाने पदवी प्रवेशासाठी ऑनलाईन नोंदणी करण्याचे ठरवित, नोंदणी करताना विद्यार्थ्यांची कागदपत्रे डाऊनलोड करावी लागणार आहेत. मात्र, बहुतांश विद्यार्थी महाविद्यालये बंद असल्याने घरी आहेत. टाळेबंदी असल्याने शहर आणि ग्रामीण भागात इंटरनेट कॅफे बंद पडले आहेत.

प्राध्यापकांसाठी कोण ठरताहेयं झारीतील शुक्राचार्य ?

अशा अनेक अडचणी लक्षात घेता पदवी प्रवेशा करिता विद्यार्थ्यांवर लादलेली ऑनलाइन नोंदणीची जाचक अट विद्यार्थ्यांना फायदेशिर ठरणारी नाही. शिवाय बऱ्याच विद्यार्थ्यांकडे लॅपटाप आणि इतर सोयी सुविधा नसल्याने ते कागदपत्र कसे डाऊनलोड करतील हा मोठा प्रश्‍न आहे. या प्रकाराने विद्यार्थी प्रवेशापासून वंचित राहण्याची शक्‍यता आहे.

प्राचार्य फोरम, प्राधीकरण सदस्यांचा विरोध

गेल्या पंधरा दिवसात कोरोनाच्या रुग्णसंख्येत सातत्याने वाढ होत आहे. अशावेळी ग्रामीण भागात इंटरनेट कॅफे वा इतर सुविधा उपलब्ध नाहीत. त्यामुळे अशा परिस्थितीत ऑनलाइन नोंदणी करुन त्यावर कागदपत्र कसे डाऊनलोड करता येईल असा सवाल महाविद्यालयातील प्राचार्यांनी उपस्थित केला आहे. यासंदर्भात शनिवारीच, विद्यापीठाचे प्रभारी कुलगुरू डॉ. मुरलीधर चांदेकर यांचेकडे प्राचार्य फोरमने जाऊन चर्चा करीत, मागण्यांचे निवेदन सादर केले. दुसरीकडे प्रवेशादरम्यान विद्यापीठ आणि महाविद्यालयाची नोंदणी करणे कुठल्या विद्यापीठात आहे? असा सवाल व्यवस्थापन परिषदेचे ज्येष्ठ सदस्य डॉ. आर.जी. भोयर यांनी उपस्थित केला असून या निर्णयाला विरोध दर्शविला आहे.