पात्रताधारक प्राध्यापक का करणार पदवी जलाओ आंदोलन ?...वाचा सविस्तर

नागपूर : राज्यात अनेक वर्षांपासून सहायक प्राध्यापक भरती न झाल्याने हजारो नेट, सेट, पीएच.डी. झालेल्या पात्रताधारकांना तुटपुंज्या मानधनावर कंत्राटी पद्धतीने काम करावे लागत आहे. वारंवार पत्रव्यवहार करून पदभरती करण्याची मागणी करूनही शासन दुर्लक्ष करीत आहे. त्यामुळे महाराष्ट्रातील पात्रताधारक युवक-युवती बेरोजगारीचा उद्रेक व्यक्त करण्यासाठी शासनाचा निषेध म्हणून शिक्षकदिनी प्रतीकात्मक ‘पदवी जलाओ आंदोलन’ आणि ‘शिक्षकदिन हा भक्षकदिन’ म्हणून साजरा करीत शासनाचे लक्ष वेधणार आहेत.

दहा वर्षांहून अधिक कालावधीपासून राज्यात प्राध्यापक भरती झालेली नाही. राज्यात ३० हजारांहून अधिक प्राध्यापकांची पदे रिक्त आहेत. असे असतानाही शासनाला यांचे गांभीर्य नाही. याउलट महाविद्यालयांमध्ये केवळ कंत्राटी प्राध्यापकांच्या नेमणुका करून तुटपुंज्या मानधनावर प्राध्यापकांकडून काम करून घेतले जात आहे. राज्य शासनाने प्राध्यापक भरती करण्याचे अनेकदा मान्य करूनही कानाडोळा केला आहे.

अभियांत्रिकी प्राध्यापकांच्या मनात कोणाबद्दल आहे प्रचंड रोष? नक्की काय आहे कारण.. वाचा

पात्रताधारकांच्या विविध संघटनांच्या वतीने शासनाला निवेदन देत अनेकदा प्राध्यापक भरती करण्यासाठी मागणी करण्यात आली. मात्र, त्याला बगल देण्यात आली.
आंदोलनामध्ये राज्यातील कला, वाणिज्य विज्ञान, वैद्यकशास्त्र, औषधनिर्माण शास्त्र, अभियांत्रिकी, व्यवस्थापनशास्त्र, सामाजिकशास्त्र आदी अभ्यासक्रमांचे उच्च शिक्षित बेरोजगार सहभागी होणार आहेत. याशिवाय तासिका, कंत्राटी, अतिथी प्राध्यापकांच्या राज्यातील ३२ संघटना सहभागी होणार आहेत. यामध्ये छात्रभरती विद्यार्थी संघटना, शिक्षक व शिक्षकेतर कर्मचाऱ्यांच्या संघटनांचा समावेश आहे. पोलिस विभाग किंवा जिल्हाधिकाऱ्यांकडून परवानगी मिळालेल्या ठिकाणी दहा ते पंधरा व्यक्ती जमा होत प्रतीकात्मक सामूहिक पदवीचे दहन केले जाणार आहे. याशिवाय कोरोनामुळे इतरांनी त्यांच्या घरीच राहून पदवीचे दहन करावे व त्याची चित्रफीत आणि छायाचित्र समाजमाध्यमांवर प्रसिद्ध करावे, असे आवाहन आयोजकांनी केले आहे.