Yin Summer youth summit 23 : ध्येय निश्चित करून त्या दिशेने वाटचाल करा;युवा कीर्तनकार अविनाश भारती

सोळावे वर्ष धोक्याचे म्हटले जात असले तरी, याच कोवळ्या वयात ज्ञानेश्वर महाराजांनी ग्रंथ लिहिला व छत्रपती शिवाजी महाराजांनी स्वराज्याचे तोरण बांधले. त्यामुळे आयुष्यात काहीतरी चांगले करायचे असेल तर कमी वयातच ध्येय निश्चित करून त्या दिशेने वाटचाल करा, असा सल्ला मराठवाडा येथील विविध पुरस्कारविजेते युवा कीर्तनकार व कवी अविनाश भारती यांनी तरुणाईला दिला.

तरुणांशी संवाद साधताना अविनाश भारती म्हणाले, कोणतीही चांगली गोष्ट करण्यासाठी वय महत्वाचे नसते. शिक्षण शिकत असतानाही मोठ्या गोष्टी करू शकता. अनेकांनी ते सिद्ध करून दाखविले आहे. मुळात तुम्ही जे काही करता ते अगदी मनापासून करा. दुसरे काय करतात किंवा काय म्हणतात, त्याकडे लक्ष देऊ नका.

तुमचे अंतर्मन आणि आत्मा काय म्हणतो ते ऐकून आयुष्याचा मार्ग निवडा. नक्कीच यश मिळेल. तरुणांनी मनाशी पक्का निर्धार, दृढनिश्चय केला तर ते काहीही करू शकतात, असे ते म्हणाले. आयुष्यात समस्या, अडचणी व नकारात्मक विचार हे येणारच. मात्र त्याला घाबरून न जाता अडचणींवर मात करून कसे पुढे जाता येईल, याचा विचार करा, असे भारती यावेळी म्हणाले.

भविष्यात प्रमुख पाहुणा बनून या

यिन समिटमध्ये तुम्ही सहभागी होण्यासाठी दुरदुरून विद्यार्थी म्हणून येथे आला आहात. दोन दिवसांत प्रेक्षकांमध्ये बसून नक्कीच खूप काही शिकला असणार. मात्र तुम्ही असे कार्य करा, जेणेकरून भविष्यात या कार्यक्रमात प्रमुख पाहुणा बनून याल. हे मला पाहायचे आहे. तोच अशा कार्यक्रमाचा उद्देश आहे, असे भारती यावेळी म्हणाले.