कोरोनाच्या धास्तीत या ग्रामपंचायतला लागले कुलूप...सांगा बरे शेतकऱ्यांची कामे कशी होणार?

वरठी (जि. भंडारा) : सध्या देशासह सर्वत्रच कोरोना विषाणूच्या आजाराने थैमान घातले आहे. त्यामुळे सर्व शासकीय तसेच निमशासकीय यंत्रणा ऍलर्ट झाल्या आहेत. पण, मोहाडी तालुक्‍यातील नीलज (बु) ग्रामपंचायतीचे कार्यालय दिवसभर बंद राहत असल्याचा आरोप येथील नागरिकांनी केला आहे.

ग्रामपंचायत कर्मचाऱ्यांचा कार्यालयाला "खो'

नीलज बु. येथील ग्रामपंचायत कार्यालयात लॉकडाउन झाल्यापासून कर्मचारी येत नाहीत. ग्रामसेवक दोन गावांचा कारभार सांभाळत असल्याने कधीकधी येतात ाणि लवकरच निघून जातात. यामुळे ग्रामपंचायत कार्यालय बंद अवस्थेत आहे. गावात स्थानिक पातळीवर प्रशासकीय यंत्रणा उदासीन दिसून येत आहे. गावातील सरपंचांनी याकडे लक्ष देणे आवश्‍यक आहे.

नाममात्र औषधीची फवारणी

नीलज (बु). येथील ग्रामपंचायतीमार्फत कोरोनाच्या काळात फक्त एकदाच नाममात्र औषधी फवारणी केली होती. तसेच या गावातील नागरिक मास्कचा वापर करीत नाही. सार्वजनिक ठिकाणी घोळक्‍याने दिसतात. परंतु, ग्रामपंचायतमार्फत जनजागृतीही केली जात नाही. त्यामुळे येथील नागरिकांत कोरोनाविषयक जनजागृती करायची गरज आहे.

जाणून घ्या : लॉकडाऊनमुळे कुत्र्यांवर आलीय हिरवा पाला खाण्याची वेळ

काळजी आम्ही घेत आहोत
ग्रामपंचायतीमार्फत कोरोनाबाबत जनजागृती सुरू आहे. मागील दिवसातच जंतुनाशक फवारणी करण्यात आली आहे. नागरिकांना सोशल डिस्टन्सिंगचे पालन करण्यासाठी माहिती दिली आहे. नागरिकांना कोणताही त्रास होणार नाही, याची काळजी आम्ही घेत आहोत.
- सुवर्णा गाढवे, सरपंच नीलज (बु.)