एसटीने केल्या सव्वाशे बसफेऱ्या स्थगित! वाचा कोणकोणत्या गावात येणार नाहीत बसेस

यवतमाळ : कोरोनाचा वाढता संसर्ग पाहता प्रशासनाने सहा शहरात संचारबंदी लागू केली आहे. यात यवतमाळ, पांढरकवडा, नेर, दारव्हा, दिग्रस तसेच पुसद शहर बंद राहणार आहे. सहा ठिकाणी एसटी महामंडळाचे आगार आहे. या ठिकाणाहून जिल्ह्याच्या मुख्यालयी येणाऱ्या बसफेऱ्यांची संख्या जास्त आहे. उर्वरित तीन आगारातूनही या शहरात जाणाऱ्या बसेसची संख्या अधिक आहे. त्यामुळेच संचारबंदीच्या काळात जिल्ह्यातंर्गत सार्वजनिक वाहतूक सेवा स्थगित ठेवण्याचा निर्णय एसटी महामंडळाने घेतला आहे.

यवतमाळ शहर आणि जिल्ह्यातील इतरही भागात कोरोनाचा संसर्ग वाढतो आहे. दिवसेंदिवस रुग्णसंख्या वाढते आहे. त्यामुळेच सहा शहरात संचारबंदी लागू करण्यात आली आहे. संचारबंदी असल्याने या काळात नागरिकांना बाहेर फिरण्याची परवानगी नाही. आधीच प्रवासी नसल्याने महामंडळ अडचणीत आहे. प्रवाशांनी सध्या एसटी महामंडळाकडे पाठ फिरविली आहे. त्यातच संचारबंदी असल्याने नागरिकांना येता येणार नाही.

एसटी महामंडळाचे जिल्ह्यात नऊ आगार आहेत. यातील सहा आगार संचारबंदी असलेल्या शहरात आहेत. संचारबंदी नसलेल्या भागातून या भागात वाहतूक होत असते. मात्र, हे शहर बंद राहणार असल्याने बसेस निघणार नाहीत. अशा स्थितीत प्रवासी असणार नाहीत. परिणामी, या भागात सुरू असलेली एसटी सार्वजनिक वाहतूक सेवा संचारबंदीच्या काळात स्थगित ठेवण्यात येणार आहे. महामंडळाचे होणारे नुकसान टाळण्यासाठी महामंडळाकडून हा निर्णय घेण्यात आला आहे.

 सविस्तर वाचा - मन सुन्न करणारा अंत्यसंस्कार : खांदेधरी व मुखाग्नी देणार कोण, या प्रश्‍नाचे यांनी दिले उत्तर...

वणी, उमरखेड व राळेगाव या ठिकाणी आगार आहे. मात्र, याठिकाणावरुन जिल्ह्याच्या मुख्यालयी येणाऱ्या फेऱ्यांची संख्या अधिक आहे. अशा स्थितीत बस आली तरी जाताना रिकामी जाणार आहे. त्यामुळेच महामंडळानेही संचारबंदीच्या काळात सेवा स्थगित ठेवण्याचा निर्णय घेतला आहे. कोरोनाच्या काळात आधीच प्रवाशांनी पाठ फिरविली असल्याने महामंडळांला आर्थिक फटका बसत आहे. त्यातच आता संचारबंदीची भर पडली आहे. परिणामी, यांचा ताणही महामंडळावर येण्याची शक्‍यता आहे. प्रवासी नसल्याने महामंडळांला दरमहा कोट्यवधी रुपयांचा फटका बसत आहे. आधीच अडचणीत असलेल्या महामंडळांला आणखी काही दिवस अडचणीचा सामना करावा लागण्याची शक्‍यता आहे.

संपादन - स्वाती हुद्दार