Video : यवतमाळकरांचे टेन्शन कमी करणारी बातमी... कोरोना रुग्णांची संख्या घटली

यवतमाळ : येथील वसंतराव नाईक शासकीय वैद्यकीय महाविद्यालयाच्या आयसोलेशन वार्डमध्ये भरती असलेले व सुरवातीला पॉझिटिव्ह रिपोर्ट्स आलेले 38 लोक, 14 दिवसाच्या कालावधीनंतर उपचारामुळे पूर्णपणे बरे झाले आहेत. त्यामुळे त्यांना सुट्टी देण्यात आली आहे. या 38 पैकी 3 जणांना संस्थात्मक विलागीकरण कक्षात ठेवण्यात येणार असून उर्वरित 35 जण गृह विलगीकरणात राहणार आहेत.

जिल्ह्यात आता एक्टिव पॉझिटिव्हची संख्या 45 वरून 7 वर आली आहे. विशेष म्हणजे 24, 25 आणि 26 एप्रिल या दरम्यान  पॉझिटिव्ह रुग्णांच्या  संख्येत सर्वाधिक भर पडली. त्यानंतर रुग्ण वाढीचा वेग कमी झाला असला तरी एक-दोन, एक-दोन पॉझिटिव्ह रुग्ण येणे सुरू होते. त्यामुळे जिल्ह्याचा एकूण आकडा पाहता पाहता 98 वर गेला होता. यापैकी तब्बल 91 जणांना बरे करण्यात आरोग्य विभागाला लक्षणीय यश आले आहे.
यवतमाळ जिल्ह्यासाठी ही अतिशय दिलासादायक बातमी असून जिल्ह्याचे पालकमंत्री संजय राठोड यांनी सर्व जिल्हा प्रशासन, पोलिस प्रशासन आणि आरोग्य विभागाचे मनःपूर्वक अभिनंदन केले आहे.

सविस्तर वाचा - दीड महिन्यापासून बंद दुकाने उघडली आणि...
सुरुवातीला केवळ यवतमाळ शहरात कोरोनाबाधित रुग्ण आढळले होते, मात्र नंतर नेर आणि उमरखेड़ (मौजा धानोरा) येथे पॉझिटिव्ह रुग्ण आल्याने चिंतेत भर पडली. उमरखेड़ येथील पॉझिटिव्ह रुग्णांच्या संपर्कात आलेल्या सर्व हाय रिस्क व लो रिस्क अशा 68 लोकांचे नमूने तपासणीसाठी पाठविले. हे सर्व रिपोर्ट्स निगेटिव्ह आले आहे. तसेच नेर येथील हाय रिस्क व लो रिस्क अशा 76 जणांचे रिपोर्ट्स तपासणीसाठी पाठवले असता यापैकी 3 जणांचे रिपोर्ट पॉझिटिव्ह तर 73 रिपोर्ट्स निगेटिव्ह आल्याचे आरोग्य विभागाने कळविले आहे.
उमरखेड़, महागाव, नेर आणि सर्व यवतमाळ जिल्ह्यासाठी ही अतिशय समाधानाची बाब आहे.