अधिकारी कामात व्यस्त, विभागाकडे मात्र दुर्लक्ष; बालाकांचा विकास होणार कसा?

नागपूर : जिल्हा परिषदेच्या महिला व बालविकास विभागातील बालविकास प्रकल्प अधिकारी, पर्यवेक्षिका, अंगणवाडी सेविका, मदतनीस आदींची मोठ्या प्रमाणात पदे रिक्त आहेत. दुसरीकडे पदाधिकारी, अधिकारी आपल्याच कामात व्यस्त असून विभागाकडे दुर्लक्ष करीत असल्याने बालकांचा विकास होणार कसा, असाच प्रश्न उपस्थित केला जात आहे.

हेही वाचा - कुणी तरी येणार येणार गं ! थाटामाटात पार पडलं श्वानाचं डोहाळे जेवण; नागपुरातील पोलिस...

एकात्मिक बालविकास योजनेअंतर्गत सहा वर्षांखालील मुलांचे पोषण व आरोग्य स्थितीत सुधारणा करणे आणि बालमृत्यू रोखण्यासाठी लसीकरण, आरोग्य तपासणी, संदर्भ सेवा, पूरक पोषण आहार, आरोग्य व पोषण आणि अनौपचारिक पूर्व प्राथमिक शिक्षण इत्यादी सेवा देण्यात येतात. यासाठी महिला व बालविकास विभाग आणि सार्वजनिक आरोग्य विभागाची यंत्रणा काम करते. जिल्ह्यात जवळपास २४२३ अंगणवाडी केंद्रांतून ६ वर्षे वयोगटातील बालके, गरोदर माता व स्तनदा माता यांना या सेवा पुरविण्यात येतात. परंतु, यानंतरही कुपोषित बालकांचे प्रमाण कमी होताना दिसत नाही. 

हेही वाचा - ब्रेकिंग: नागपूर जिल्ह्यातील उमरेडजवळ भीषण अपघात;...

जिल्ह्यात ९०२ कुपोषित बालके आहेत. विभागातील महत्त्वाची असलेली रिक्त पदे याला कारणीभूत असल्याचे बोलले जाते. महिला व बालकल्याण विभागाअंतर्गत बालविकास प्रकल्प अधिकारी, पर्यवेक्षिका, अंगणवाडी सेविका, मदतनीस, मिनी अंगणवाडी सेविका यांची पदे मोठ्या प्रमाणात रिक्त आहेत. याकडे पदाधिकारी, अधिकाऱ्यांचे लक्ष नाही. कंत्राट आणि बदल्यांवर त्यांचा भर असल्याची चर्चा आहे. नुकतेच एक कर्मचाऱ्याच्या बदलीचा विषय चांगलाच गाजला होता. कंत्राटावरूनही वाद झाल्याची चर्चा आहे. यामुळे कर्मचाऱ्यांमध्ये नाराजी असल्याचे सांगण्यात येते.