ही तर माणुसकीची हद्दच! गावच्या रक्षकानेच केली विलगीकरण कक्षातील महिलेला शरीरसुखाची मागणी 

अमरावती : कोरोनामुळे आर्थिक संकटात सापडलेल्या राज्याचे महसूल उत्पादन वाढविण्याच्या दृष्टीने महाराष्ट्र शासनाने सुरू केलेल्या मद्यविक्रीचा परिणाम अमरावती जिल्ह्यात लॉकडाउन दरम्यान प्रथमच समोर आला. दारूच्या नशेत एका पोलीस पाटलाने गावातील शाळेत असलेल्या विलगीकरण कक्षात जाऊन तेथील महिलेला शरीर सुखाची मागणी केल्याची धक्कादायक बाब समोर आली आहे. माणुसकीला काळीमा फासणारी ही घटना जिल्ह्यातील वडगाव (वाजदी) येथे शुक्रवारी, 8 मे रोजी घडली. 

कोरोनाच्या संकटामुळे राज्यासह संपूर्ण देश सध्या चिंतेत आहे. कोरोना व्हायरसचा प्रादुर्भाव रोखण्यासाठी शासन आणि प्रशासन युद्ध पातळीवर प्रयत्न करीत आहेत. इतर व्यक्तींना कोरोनाची बाधा होऊ नये म्हणून कोरोना पॉझिटिव्ह रुग्णांना विलगीकरण कक्षात ठेवण्यात येत आहे. मात्र, अशातच अमरावती जिल्ह्यात घडलेली एक संतापजनक घटना नुकतीच समोर आली. जिल्ह्यातील चांदूररेल्वे पोलीस स्टेशनअंतर्गत येणाऱ्या वडगाव (वाजदी) येथील जिल्हा परिषद शाळेत कोरोना पॉझिटिव्ह रुग्णांसाठी विलगीकरण कक्ष स्थापन केला आहे. 

अवश्य वाचा-  जंगलात घात लावून केले त्याने महिनाभरात तिघांवर जीवघेणे हल्ले...

शुक्रवारी, 8 मे रोजी गावातील पोलीस पाटील प्रदीप गजबे (वय ३६) हा दारू ढोसून शाळेत असलेल्या विलगीकरण कक्षात गेला. त्यानंतर तेथे असलेल्या महिलेला अश्‍लील शिवीगाळ करीत शरीर सुखाची मागणी केली. मागणी पूर्ण न केल्यास उपाशी ठेवण्याची धमकी सुद्धा तिला दिली. अचानक घडलेल्या या प्रकाराने महिला घाबरली. तिने आरडाओरड करीत सरळ विलगीकरण कक्षातून पळ काढला. शनिवारी, 9 मे रोजी तिने चांदूररेल्वे पोलीस ठाणे गाठून पोलिस पाटलाविरुद्ध तक्रार दाखल केली आहे. महिलेच्या तक्रारीवरून पोलिसांनी पोलीस पाटील प्रदीप गजबे याच्याविरुद्ध विनयभंगाचा गुन्हा नोंदवून त्याला अटक केली आहे.