गडचिरोलीतील एटापल्लीत मोठा अनर्थ टळला; नक्षलवाद्यांनी पेरून ठेवलेले भूसुरुंग पोलिसांनी केले नष्ट  

गडचिरोली : एटापल्ली तालुक्यातील कोटमी पोलिस मदत केंद्राच्या हद्दीतील कोकोटी जंगल परिसरात नक्षलवाद्यांनी पेरून ठेवलेले 10 किलोग्रामचे दोन भुसुरुंग पोलिसांनी नष्ट करत नक्षलवाद्यांचा घातपाताचा मोठा कट उधळून लावला.

मंगळवारी (ता. २३) उपविभाग एटापल्लीअंतर्गत येणाऱ्या कोटमी पोलिस मदत केंद्राच्या हद्दीतील कोकोटी जंगल परिसरात प्राप्त गोपनीय माहीतीवरून विशेष अभियान पथक गडचिरोलीसह विशेष कृती दल व कोटमी पोलिस मदत केंद्राचे जवान नक्षलविरोधी अभियान राबवित असताना सकाळी ९:३० वाजेच्या सुमारास कोकोटी गावाच्या उत्तरेला असलेल्या जंगल परिसरातील पहाडी भागात नक्षलवाद्यांनी कॅम्प लावलेला असल्याची संशयास्पद हालचाल दिसून आली. 

 हेही वाचा - धक्कादायक! पोहरादेवीत गर्दी जमवण्यासाठी शिवसेनेच्या जिल्हा परिषद सदस्यांना होतं टार्गेट; गर्दी...

पोलिस जवान नक्षलवाद्यांच्या दिशेने आगेकुच करीत असताना जवानांना पाहून जेवण बनविण्याच्या तयारीत असलेल्या नक्षलवाद्यांनी प्लॉस्टिक शिट, स्वयंपाकाचे भांडे, भाजीपाला, राशन, पिण्याचे पाणी, चप्पल, जोडे, कपडे, पिट्टू तसेच खुप मोठया प्रमाणावर असलेले जीवनावश्यक साहित्य सोडून घनदाट जंगलाच्या दिशेने पळ काढला. जवानांनी या परिसरात शोध अभियान राबविले असता, पहाडीच्या पूर्व दिशेला १ व पश्चिम दिशेला १ असे दोन इलेक्ट्रीक वायर दिसुन आले. हे इलेक्ट्रीक वायरवरून नक्षलवाद्यांकडुन घातपाताची योजना असावी असा संशय आल्याने बॉम्बशोधक व नाशक पथकाकडून घटनास्थळाची तपासणी केली असता, नक्षलवाद्यांनी घातपाताच्या उद्देशाने १० किलोग्रॅमचे दोन ब्लॉस्ट पुरुन ठेवलेले असल्याचे आढळून आले. 

नक्षलवाद्यांनी जमिनीत पेरून ठेवलेला ब्लॉस्ट जमिनीबाहेर काढणे धोक्याचे असल्यामुळे बीडीडीएस पथकाकडुन जागेवरच नाश करण्यात आले. हे कृत्य कलम ३०७, १४३, १४७, १४८, १४९, १२० (ब) भादंवि सहकलम ४,५ भास्फोका अन्वये होत असल्याने या भागात सक्रीय असणाऱ्या कंपनी क्र.४ चा कमांडर प्रभाकर उर्फ रवी उर्फ प्रकाल वीर उर्फ पदकाला स्वामी उर्फ लोकेटी चंदर राव तसेच कसनसुर दलम डिव्हीसीएम व सहकारी नक्षलवाद्यांवर रेगडी पोलिस मदत केंद्रात फिर्याद नोंदवण्यात आली आहे. 

हेही वाचा - "मुख्यमंत्र्यांचे आदेश शिवसेनेच्या मंत्र्यांना पटले नसावेत म्हणूनच गर्दी झाली"

नक्षलविरोधात महत्वपुर्ण कारवाई करत नक्षलवाद्यांनी घातपाताचा कट उधळुन लावणाऱ्या जवानांच्या शौर्यपूर्ण कामगिरीचे पोलिस अधीक्षक  अंकित गोयल यांनी कौतुक केले असुन नक्षलविरोधी अभियान अधिक तीव्र करण्याचे संकेत दिले आहेत.

संपादन - अथर्व महांकाळ