"त्याने' केले होत्याचे नव्हते, आता बळीराजाला कोण सावरणार?

नवेगावबांध (जि. गोंदिया) : शुक्रवारी मध्यरात्रीनंतर अर्जुनी मोरगाव तालुक्‍यात जोरदार अवकाळी पावसाने हजेरी लावली. गोंदिया जिल्ह्यात सर्वाधिक पर्जन्यवृष्टी अर्जुनी मोरगाव महसूल मंडळात 43.2 मिमी झाली. त्याखालोखाल बोंडगावदेवी येथे 28 मिमी तर नवेगावबांध महसूल मंडळात 12 मिमी पर्जन्यवृष्टी झाली. या अवकाळी पावसामुळे शेतकऱ्यांचे मोठे नुकसान झाले.

सावरटोला येथील शेतकऱ्यांच्या भाजीपाला पिकांचे मोठे नुकसान झाले. तरोणे त्यांच्या शेतात पाणी साचलेले आहे. सध्या मिरचीचे पहिले पीक निघाले आहे. दुसरे पीक निघण्याच्या स्थितीत असताना झालेल्या अवकाळी पावसामुळे मिरची काळी पडण्याची चिन्हे आहेत. या अवकाळी पावसामुळे नुकसान झाल्याची कबुली तालुका कृषी अधिकारी धनराज तुमडाम यांनी दिली. पंचनामे करण्याचे काम सुरू असल्याचे त्यांनी सांगितले. या पावसाचा टरबूज पिकालाही धोका असल्याचे सांगितले जाते.

शेतकरी भरडला जातोय

कधी ओला तर कधी कोरड्या दुष्काळाने शेतकरी पुरता हवालदिल झाल्याचे चित्र असताना ढगाळ वातावरण राहत असल्याने पिकांवर मोठ्या प्रमाणात रोगांचा प्रादुर्भाव झाला आहे. या आठवड्यात शनिवार, मंगळवार व बुधवारला जिल्ह्यातील काही गावात अवकाळी पाऊस होण्याची शक्‍यता हवामान खात्याने वर्तवली आहे. या अस्मानी संकटात शेतकरी भरडला जात आहे.

मागच्या वर्षीही जिल्ह्याला नुकसानातून वगळले होते

यापूर्वीसुद्धा नोव्हेंबर महिन्यात धानपीक तोडणी झाल्यानंतर अवकाळी पावसाने हजेरी लावली होती. त्यावेळी धान पिकाचे मोठे नुकसान झाले होते. आमदार मनोहर चंद्रिकापुरे व जिल्हाधिकारी कादंबरी बलकवडे यांनी भिवखिडकी परिसरात भेट देऊन पिकांची पाहणी केली होती.

त्यामुळे शेतकऱ्यांना मदत देण्यात आली. ऑगस्ट व सप्टेंबर महिन्यात झालेल्या अतिवृष्टीमुळे नाल्याच्या काठावर असलेल्या शेतकऱ्यांना फटका बसला होता. अर्जुनी मोरगाव, गोंदिया व तिरोडा तालुक्‍यात सुमारे अडीच हजार हेक्‍टर शेतजमिनीतील धान पिकाचे नुकसान झाले होते. या नुकसानाचे सर्व्हे, पंचनामे करण्यात आले होते. मात्र, गोंदिया जिल्ह्याला नुकसानातून वगळण्यात आले होते.

असे काय घडले? : तो म्हणाला होता मी पुन्हा येईन...अन खरच आला, मग...

पुन्हा वादळी पावसाचा इशारा

हवामान विभागाने जिल्ह्यात सोमवार आणि मंगळवारी अवकाळी पाऊस आणि गारपीट होण्याचा अंदाज वर्तविला आहे. त्यामुळे यंदा शेतकऱ्यांना रब्बी हंगामाला मुकावे लागण्याची शक्‍यता असल्याने त्यांच्यात चिंतेचे वातावरण पसरले आहे.