वर्धा : जिल्ह्यातील महिला बचतगटांनी (self help group) एकत्र येत, हायटेक होत अॅमेझॉनवर वर्धिनी (wardhini) नावाने आपला ब्रँड तयार करून उत्पादने विक्रीस ठेवली आहेत. त्यातून एक वर्षाच्या काळात वर्धिनींनी तब्बल १२ लाखांची कमाई केली. महिला सक्षमीकरणाचे हे उत्तम उदाहरण आहे. (self help group earned 12 lakh from wardhini in wardha)
या बचतगटाचा उद्देश जिल्ह्यात पूर्णत्वास जात असल्याचे पुढे येत आहे. वर्धेतील ही चळवळ इतर जिल्ह्यांसाठी आदर्श ठरणारी आहे. याला येथील अधिकाऱ्यांचेही तेवढेच पाठबळ मिळत आहे. वर्धेत सुरू करण्यात आलेल्या या अभियानात ६८ बचतगटांचा समावेश आहे. या गटांकडून तब्बल ६८ खाद्यपदार्थ यात ठेवण्यात आले आहेत. या पदार्थांना बाजारपेठ मिळावी यासाठी जिल्हा ग्रामीण विकास यंत्रणेतून प्रयत्न करण्यात आले. यातूनच जिल्ह्यातील वर्धिनी हायटेक झाल्या आणि वर्धेतील ग्रामीण भागात तयार होत असलेले पदार्थ ग्लोबल झाले.
दररोज सुरू असते डिलिव्हरी -
ऑनलाइन ऑर्डर येताच त्याची डिलिव्हरी होत असते. ऑर्डर बुक होताच अॅमेझॉनचा कर्मचारी येऊन तो दिलेल्या ठिकाणी पोहोचवत असतो. हा प्रकार वर्धा जिल्ह्यात सहज होत असला, तरी बाहेर जिल्ह्यात आणि राज्यासाठी याची आधीच तयारी करावी लागते.
पॅकिंगच्या खर्ड्याची येत आहे अडचण -
महिला बचतगटांनी तयार केलेले उत्पादन ग्राहकांपर्यंत व्यवस्थितरित्या पोहोचण्यासाठी पॅकिंग आवश्यक आहे. ही पॅकिंग करण्यासाठी जाड खर्ड्यांची आवश्यकता असते. सध्या हे खर्डे मिळत नसल्याने अडचण येत आहे. यावर तोडगा काढण्यासाठी बचतगटांमार्फतच हे खर्डे तयार करण्याचा प्रयत्न आहे.
