अमरावतीत आणखी सात पॉझिटिव्ह!

अमरावती : अमरावतीत कोरोना रुग्णांची संख्या दिवसेंदिवस वाढत असल्याने नागरिकांच्या प्रशासनाच्या चिंतेत वाढ होते आहे. कोरोनाच्या या वाढत्या संख्येला कसा अटकाव करावा, असा प्रश्‍न प्रशासनासमोर उभा राहिला आहे.

श्रीसंत गाडगेबाबा अमरावती विद्यापीठाच्या कोरोना विषाणू चाचणी प्रयोगशाळेतून जिल्हा आरोग्य यंत्रणेला गुरुवारी (ता. 11) एकूण सात अहवाल पॉझिटिव्ह प्राप्त झाले. यात साबनपुरा येथे अस्थायी वास्तव्यास असलेल्या मलेशीयन युवकासह अकोली येथील दाम्पत्याचा अहवाल पॉझिटिव्ह आला आहे. साबनपुरा, जमील कॉलनी आणि अकोली कोरोनाबाधित आढळणारे नवे परिसर आहेत.

सात पॉझिटिव्ह रुग्णांमध्ये महिला (वय 40, रा. जुनीवस्ती बडनेरा), युवक (वय 18, रा. बडनेरा), पुरुष (वय 42, रा. अकोली), महिला (वय 34, रा. अकोली), पुरुष (वय 55, रा. जमील कॉलनी), युवक (वय 28, रा. साबनपुरा), पुरुष (वय 63, रा. सदरबाजार परतवाडा) यांचा समावेश आहे. अकोली येथील 42 वर्षीय व्यक्ती ही महाराष्ट्र राज्य मार्ग परिवहन महामंडळाच्या वरुड आगारात चालक आहे. कर्तव्यावर असताना त्यांना कोरोनाची लागण झाली असल्याची शक्‍यता वर्तविली जात आहे. त्यांच्यासोबत त्यांच्या पत्नीचा कोरोना अहवालही पॉझिटिव्ह आल्याने त्याच्या एका पाच वर्षीय मुलीस क्वारंटाइन करण्यात आले आहे.

साबनपुरा येथील पॉझिटिव्ह आढळलेला 28 वर्षीय युवक हा मुळचा मलेशियाचा आहे. तो दीर्घकालीन व्हिसा घेऊन मार्चमध्ये शहरात आला होता. साबनपुरा येथील मशीद परिसरात वसतिगृहामध्ये एकटा राहत होता. कोरोना संकटामुळे त्याने मायदेशी परत जाण्याच्या इराद्याने कोरोना चाचणी करून घेतली, मात्र त्याचा चाचणी अहवाल पॉझिटिव्ह आल्याने त्याला कोविड रुग्णालयात हलविण्यात आले.

सविस्तर वाचा - मुंढे साहेब, सातशे जणांना क्‍वारंटाईन करण्याची वेळ कोणामुळे आली आता माफी मागा...

जमील कॉलनी येथील व्यक्ती फर्निचर व्यावसायिक असून त्याला सर्दी, ताप, खोकल्याचा त्रास होता. शंकेमुळे त्यांनी नागपुरीगेट केंद्रात कोरोना चाचणीसाठी बुधवारी (ता. दहा) नमुना दिला. त्याचाही अहवाल पॉझिटिव्ह आला. परतवाड्याच्या सदरबाजार परिसरात यापूर्वी कोरोनाबाधित वृद्धेच्या पतीचा कोरोना चाचणी अहवाल पॉझिटिव्ह आला. वृद्धेवर नागपूर येथे उपचार केले जात आहे. तिच्या मुलाचा कोरोना चाचणी अहवाल यापूर्वीच पॉझिटिव्ह आलेला आहे.