"ती' शाळेतून घरी जात होती अन्‌... 

अमरावती  : अल्पवयीन शालेय विद्यार्थिनीचे दुचाकीवरून अपहरण करून तिच्यावर लैंगिक अत्याचार करण्यात आला. अचानक ओढवलेल्या या प्रसंगाने पीडित मुलीच्या मनावर इतका परिणाम झाला की तिने चक्क युवकाच्या घरातच उंदीर मारण्याचे विष प्राशन करून आत्महत्येचा प्रयत्न केला. पीडितेला उपचारासाठी जिल्हा सामान्य रुग्णालयात दाखल करण्यात आले आहे. 

जबरदस्तीने दुचाकीवर बसविले 

तिवसा तालुक्‍यातील एका गावात ही घटना घडली. पीडितेच्या तक्रारीतून तिवसा पोलिसांनी शनिवारी (ता. 28) रात्री ऋषिकेश वडतकर (वय 20) याच्याविरुद्ध अपहरण, लैंगिक अत्याचारासह धमकी दिल्याप्रकरणी गुन्हा दाखल केला आहे. गुरुवारी (ता. 26) दुपारी अडीच ते तीनच्या सुमारास ही घटना घडली. पीडित विद्यार्थिनी इयत्ता दहावीत शिकते. गुरुवारी दुपारच्या सुटीमध्ये ती मैत्रिणीसोबत जेवण करण्यासाठी घराकडे जाण्यास निघाली होती. वाटेत तिच्या चपलेचा पट्टा तुटला. शिवाय सोबत असलेली मैत्रीण पुढे निघून गेली. आरोपी ऋषिकेषने तिला रस्त्यातच गाठले. धमकी देऊन जबरीने दुचाकीवर बसण्यासाठी भाग पाडले. त्याने तिला स्वत:च्या घरी नेऊन तिच्यावर लैंगिक अत्याचार केला. 

अवश्‍य वाचा- प्रियकराने दिला दगा अन्‌ ती लागली रडायला​

पीडितेचा आत्महत्येचा प्रयत्न 

या प्रसंगामुळे घाबरलेल्या विद्यार्थिनीने ऋषिकेशच्या घरातच असलेले उंदीर मारण्याचे पावडर खाल्ले. त्यामुळे तिची प्रकृती बिघडली. हा प्रकार मुलीच्या पालकांना माहिती पडला. त्यांनी ऋषिकेशच्या घरात गंभीर स्थितीत पडून असलेल्या मुलीला उपचारासाठी ग्रामीण रुग्णालयात व नंतर जिल्हा सामान्य रुग्णालयात दाखल केले. तिवसा ठाण्याच्या महिला पोलिस उपनिरीक्षक श्रीमती वंजारी यांनी पीडित मुलीचे बयाण नोंदविले. त्यात अपहरणानंतर स्वत:च्या घरी नेऊन ऋषिकेशने अत्याचार केल्याचे तिने सांगितले. पीडितेला इर्वीनमध्ये दाखल केल्याचे कळताच ऋषिकेश पसार झाला. रविवारपर्यंत (वय 29) त्याला अटक झाली नसल्याचे तिवसा पोलिसांनी सांगितले.