अधिकारी सुस्त झाल्याने दर्यापुरात कामांचा बोजवारा

दर्यापूर : नागरिकांच्या समस्यांचे निवारण करण्यासाठी महाराष्ट्र जीवन प्राधिकरण कुचकामी ठरल्याचे चित्र दर्यापुरात दिसून येत आहे. कामांचा निपटारा वेळेत करण्याचे नियम असताना नियमांना धाब्यावर बसवून अधिकारी सुस्त झाले आहे. यामुळे साईनगर, मूर्तिजापूर रोड, मोमीनपुरा, सदानंद कॉलनी भागातील नागरिकांना नाहक त्रासाला सामोरे जावे लागत आहे.

दर्यापूर शहरातील जीवन प्राधिकरणच्या कामांची निविदा खामगाव येथील कंत्राटदाराला दिलेले आहे. मात्र अनेक ठिकाणी खोदकाम करीत थंडपणे कामे केली जात असल्याचे दिसत आहे. पाइपलाइन तथा लिकेज आदी कामे वेळेत पूर्ण न झाल्याने नागरिक त्रस्त झाले आहेत. अनेक ठिकाणी पाणीपुरवठा होत नसल्याच्या तक्रारी प्राप्त होत असून यावर कार्यकारी अभियंता चुप्पी साधून बसले आहेत.

वाचा - सकाळ इम्पॅक्ट : बनावट प्रमाणपत्र प्रकरणी उपशिक्षणाधिकाऱ्यालाही अटक

गेल्या सहा महिन्यांपासून जुन्या दर्यापुरातील पाण्याच्या टाकीचा प्रश्‍न प्रलंबित आहे. निधी उपलब्ध असतानासुद्धा कामे केली जात नाहीत. कंत्राटदार कधीच येत नाहीत. त्यांचे दर्यापुरातील कामावर लक्ष नाही, मन मानेल तशी कामे केली जात असल्याचा आरोप नागरिकांचा आहे. कार्यकारी अभियंता दुर्लक्ष करीत आहेत. यावर आता नागरिकांनी थेट आमदार बळवंत वानखडे यांना साकडे घालत प्रश्‍न सोडविण्याची मागणी केली. दर्यापुरातील उपविभाग अधिकारी व कर्मचारी सदर प्रश्‍न सोडविण्यासाठी प्रयत्न करीत आहेत. मात्र वरिष्ठस्तरावरून सहकार्य मिळत नसल्याने कामे प्रलंबित आहेत. तातडीने कार्य करून प्रश्‍न मार्गी लावण्याची मागणी नागरिकांनी केली आहे.

संपादन - नरेश शेळके