सासुरवाडीला पत्नीला आणायला आलेल्या जावयाची आत्महत्या

गडचिरोली - सासुरवाडीला पत्नीला आणायला आलेल्या जावयाने विष पिऊन आत्महत्या केल्याची घटना मंगळवार (ता. ३१) चामोर्शी तालुक्यातील आष्टी येथे घडली. योगेश आकाराम बन्सोड (वय ३४) रा. इंदिरानगर, नागपूर असे मृताचे नाव आहे.

प्राप्त माहितीनुसार योगेश बन्सोड हा नागपूर येथील रहिवासी असून तो सोमवारी आष्टी येथील त्याचे सासरे धनराज देठे यांचे घरी पत्नी स्नेहा हिला नेण्यासाठी आला होता. रात्री जेवण झाल्यानंतर मृत योगेश व त्याची पत्नी स्नेहा बाहेर फिरायला गेले होते. या दाम्पत्याची झोपण्याची व्यवस्था करून सासू, सासरे छतावर झोपण्यासाठी गेले. मंगळवारी पहाटे ४ वाजताच्या सुमारास योगेश उलटी करीत असल्याचा आवाज आल्याने सासू सुमित्रा देठे यांनी खाली येऊन काय झाले, अशी विचारणा केली असता मी विष घेतले, असे त्यांनी सांगितले.

लगेच योगेशला दुचाकीने आष्टी ग्रामीण रुग्णालयात दाखल करण्यात आले. मात्र, उपचार दरम्यान त्याचा मृत्यू झाला. घटनेची माहिती मिळताच पोलिसांनी रुग्णालयात पोहोचून पंचनामा केला व मृतदेह उत्तरीय तपासणीसाठी पाठवला. घटनेची माहिती मिळताच मृताची आई व नातेवाईकांनी सखोल चौकशी करून न्याय द्यावा, अशी मागणी केली आहे. या प्रकरणी मृताने पत्नीच्या नावाने चिठ्ठी लिहून ठेवल्याची माहिती मिळाली असून ही चिठ्ठी त्यानेच लिहिले की दुसऱ्याने याची सत्यता पोलिसांच्या तपासानंतरच समोर येणार आहे.