अचलपूर (अमरावती) ः शासन शेतकऱ्यांबाबत कितीही कळवळा दाखवीत असले तरी प्रत्यक्षात मात्र शेतकरी जाचक अटींमुळे हतबल झाला आहे. हे प्रत्यक्षात निर्माण झालेल्या परिस्थितीतून दिसून येते. आज बॅंकांकडून पीककर्ज घ्यायचे झाले तर लागणाऱ्या कागदपत्रांची जुळवाजुळव करताना शेतकऱ्यांची दमछाक होत आहे. नको त्या कागदपत्रांची मागणी बॅंकांकडून केली जात असल्याने हतबल झालेल्या बळीराजाला पीककर्जापासून वंचित राहावे लागत आहे.
शेतीचा नकाशा या प्रमाणपत्राचा पीककर्जासाठी काहीच संबंध येत नसतानाही बॅंकेकडून शेतकऱ्यांची नकाशासाठी अडवणूक केली जात असल्याचा तक्रारी शेतकऱ्यांच्या आहेत. विशेष म्हणजे भूमीअभिलेख अधिकारी यांनी सर्व बॅंकांना शेतीच्या नकाशाची शेतकऱ्यांना मागणी करू नका, या नकाशाचा पीककर्जाशी कोणताही संबंध नाही, असे रीतसर लेखी स्वरूपात कळविले आहे, तरीसुद्धा बॅंकांच्या वतीने या शेतीच्या नकाशाची मागणी करण्यात येत आहे. शेती संबंधित असलेल्या सातबारा, आठ अ फेरफार असतानासुद्धा बॅंकेकडून पीककर्जासाठी अडवणूक करण्यात येत आहे. सध्या पिके जोमात आहेत, त्यासाठी आताच खरी पैशांची गरज आहे. वेळ निघून गेल्यावर पीककर्जाचा कोणताही फायदा शेतकऱ्यांना होणार नाही. उलट पिकांना वेळेवर खत, फवारणी न केल्यास नुकसान जास्तप्रमाणात होईल, करिता बॅंकेच्या अशा आठमुड्यापणामुळे शेतकऱ्यांना पीककर्जासाठी विलंब होत आहे. जिल्हाधिकाऱ्यांनी सर्व बॅंकांना शेतीच्या नकाशाची मागणी न करण्यासाठी आदेश द्यावे, जेणेकरून शेतकऱ्यांना वेळेवर पीककर्ज मिळून दिलासा मिळेल अशी मागणी होत आहे.
नकाशासाठी शेकडो अर्ज
भूमी अभिलेख कार्यालयात दररोज शेकडो शेतकरी शेतीच्या नकाशासाठी अर्ज करीत आहेत. या नकाशासाठी किमान आठ ते दहा दिवस लागतात. परिणामी नकाशामुळे पीककर्जाला विलंब होत आहे. या नकाशाचा पीककर्जासाठी कोणताही उपयोग होत नाही, तरीसुद्धा बॅंकेच्या वतीने शेतकऱ्यांना नाहक त्रास देण्यासाठी या नकाशाची मागणी करण्यात येत असल्याची ओरड आहे.
पीककर्जासाठी शेतीच्या नकाशाचा कोणताही उपयोग नाही. सातबारा, आठ अ, फेरफार यातच सर्वकाही आहे. त्यामुळे नकाशा मागण्याची काही गरज नाही, याबाबत सर्व बॅंकांना लेखी स्वरूपात कळविले आहे, तरीसुद्धा बॅंकांकडून शेतकऱ्यांना विनाकारण त्रास देण्यात येत आहे.
-एस. बी. जारंडे, उपअधीक्षक, भूमी अभिलेख अचलपूर.
-संपादन ः चंद्रशेखर महाजन
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.