मुलांना बॅंकेत नोकरीही लागली नाही...तीन लाख रुपयेही बुडाले...वाचा काय आहे प्रकरण

अमरावती : नीळकंठ सुखदेव वानखडे (वय 59, रा. हनुमाननगर) हे सेवानिवृत्त कर्मचारी असून त्यांनी मुला, मुलीच्या लग्नासंदर्भात गंभीर मुख्य संचालक असलेल्या मॅरेज ब्युरोमध्ये नोंदणी केली होती. तेव्हापासून त्यांची ओळख झाली.

गंभीर याने काही दिवसांपूर्वी जिल्हा मध्यवर्ती सहकारी बॅंकेत लिपिक व शिपाई पदाच्या जागा रिक्त आहेत, त्या जागा बॅंकेच्या संचालकामार्फत आपल्याच मध्यस्थीने भरल्या जातात, अशी माहिती वानखडे यांच्यासोबत बोलताना दिली होती.

बॅंक खात्यात पहिली किस्त जमा

लिपिक पदासाठी पाच लाख व शिपाई पदासाठी 4 लाख रुपये, असे दर सांगितले होते. दोन्ही मुलामुलींचे मिळून दहा लाख द्यावे लागतील, असे त्यांनी सांगितले होते. त्यामुळे 17 मे 2019 रोजी सायंकाळी सव्वापाचच्या सुमारास गंभीर यांच्या बॅंक खात्यात वानखडे यांनी पहिली किस्त म्हणून तीन लाख रुपये मोर्शीच्या बॅंकेतून पाठविले. उर्वरित रक्कम वेतनातून कपात केली जाईल, असाही व्यवहार त्यांच्यात झाला होता.

मुलास दिलेले पत्रही बनावट

परंतु बरेच दिवस लोटूनही मुलास नोकरी लागली नाही. बॅंकेमध्ये चौकशी केली असता, अशा प्रकारची कोणतीही पदे रिक्त नसल्याचे सांगण्यात आले. शिवाय गंभीर याने वानखडे यांच्या मुलास दिलेले पत्रही बनावट असल्याचे बॅंकेत करण्यात आलेल्या चौकशीत निष्पन्न झाले. त्यामुळे श्री. वानखडे यांनी फ्रेजरपुरा ठाण्यात तक्रार नोंदविल्यावर हा गुन्हा दाखल झाल्याचे पोलिसांनी सांगितले.

जाणून घ्या : मुलीने आईला फोन करून सांगितले मी लग्न केले; मात्र, इतक्या लाखांमध्ये झाला होता सौदा...

पालकाची तब्बल तीन लाख रुपयांनी फसवणूक

जिल्हा मध्यवर्ती बॅंकेत लिपिक व शिपाई पदावर नोकरी लावून देण्याचे आमिष दाखवून बेरोजगार युवकाच्या पालकाची तब्बल तीन लाख रुपयांनी फसवणूक करण्यात आल्याचे प्रकरण गुरुवारी (ता. 25) उजेडात आले. त्यामुळे फ्रेजरपुरा पोलिस ठाण्यात याप्रकरणी आनंद गंभीर विरुद्ध फसवणुकीचा गुन्हा दाखल झाला आहे. त्यामुळे अशा फसवणूक करणाऱ्या व्यक्तींपासून सावध राहण्याचे आवाहन पोलिसांनी केले आहे.