पाऊस आला धाऊन, संसार गेला वाहून! पुनर्वसनाच्या प्रतीक्षेतील गावे अखेर वैनगंगेच्या कोपाला बळी

भंडारा : वैनगंगेवरील गोसेखुर्द या महत्वाकांक्षी धरणाच्या बाधित क्षेत्रातील गावांची यादी जाहीर करून प्रशासनाने त्यांची पहिला ते तिसरा टप्पा अशी वर्गवारी केली होती. धरणाचे काम पूर्ण झाल्यावर पाणी अडविण्यात आले.

बाधित भागात पाणी साचले त्यानुसार इतर गावांचे पर्यायी गावठाणात पुनर्वसन करण्यात आले. त्याचप्रमाणे करचखेडा, सालेबर्डी, पिंडकेपार येथील गावकऱ्यांना जवळपास ११ वर्षांपूर्वीच घरे व शेतीचा मोबदला पुनर्वसन विभागाने दिला आहे. त्यानंतर पर्यायी गावठाणात पुनर्वसन होण्याची प्रतीक्षा करणाऱ्या गावकऱ्यांना कोणत्याही ठिकाणी अद्याप जागा मिळाली नाही. त्याबाबत शासकीय विभागाने पट्टे दिल्याची माहिती आहे. मात्र, त्यावरील प्लॉटचे प्रकल्पग्रस्तांना वाटप केले नाही. त्यामुळे अद्यापही ही गावे जुन्याच ठिकाणी असून दरवर्षी वैनगंगेच्या कोपाला बळी पडत आहेत.

तालुक्‍यातील सालेबर्डी, पिंडकेपार आणि करचखेडा या वैनगंगेच्या काठावरील तीन गावांचे पुनर्वसन करण्यात येणार आहे. येथील गावकऱ्यांना ११ वर्षांपूर्वीच घरांचा व शेतीचा मोबदला मिळाला. मात्र, पुनर्वसनासाठी पर्यायी जागा मिळालीच नाही. त्यामुळे गावकरी तेथेच राहत असून या महापुरात त्यांचे सर्वस्व वाहून गेले आहे.

महापुरात गेले वाहून
गेल्या आठवड्यात वैनगंगेला आलेल्या महापुरात या तीनही गावातील जुनी घरे कोसळून माती मलब्याचे ढिगारे निर्माण झाले आहेत. सुदैवाने यात जीवित हानी झाली नसली तरी, अनेक संसारांची भांडीकुंडी पुरात वाहत गेली आहेत. त्यामुळे जीव वाचला असला तरी, येथील महिला पुरुषांच्या डोळ्यादेखत त्यांचा संसार विस्कटल्याचे दु:ख त्यांच्या चेहऱ्यावर स्पष्ट दिसते. नवीन गावठाणात जागा मिळाली तरी, गेल्या १० वर्षांत बांधकाम साहित्यांच्या किंमती दुपटीने वाढल्या आहेत. तेव्हा येथील गावकरी नवीन घरांचे बांधकाम कसे करतील असा प्रश्‍न निर्माण झाला आहे.

सविस्तर वाचा - दमदार पाऊस व महापुराने उडवली दाणादाण; आता प्रादेशिक हवामान विभागाने दिला हा इशारा

जलसंपदा व लाभक्षेत्र विकास राज्यमंत्री बच्चू कडू यांनी पूरबाधित गावांना रविवारी भेट दिली. तेव्हा या तीन गावांतील गावकऱ्यांनी त्यांना पुनर्वसनासाठी पर्यायी जागा आणि बांधकामासाठी सानुग्रह अनुदान देण्याची मागणी केली. त्यांनी पूरग्रस्तांचे त्वरित पंचनामे करून शासनाची मदत त्यांच्या खात्यात जमा करण्याचे निर्देश दिले आहेत.

संपादन - स्वाती हुद्दार