वाघ होता छाताडावर; तरीही हारली नाही हिंमत...अंगावर शहारे आणणारी ही बातमी वाचाच

सिहोरा (जि. भंडारा) : मागच्या रविवारी (ता. 19) गोंदेखारी शिवारात वाघाने गणेश बनकर या शेतकऱ्यावर हल्ला करून जखमी केले होते. त्यानंतर हा वाघ ग्रीन व्हॅली चांदपूर पर्यटनस्थळाच्या जंगलात पळून गेल्याची माहिती वनविभागाने दिली होती.

परंतु, हा वाघ याच परिसरात तळ ठोकून होता. शनिवारी सिहोरा येथील आठवडी बाजार असल्याने तुमसर-बपेरा राज्यमार्गावर रहदारी सुरू होती. बिनाखी गावाच्या शिवारात राज्यमार्गावर झुडपात वाघ दडून बसला होता.

दुचाकीचालकांवर केला हल्ला

याच मार्गाने गोंदेखारी येथील छोटेलाल ठाकरे (वय 35) हा दुचाकीने जात होता. यावेळी वाघाने अचानक हल्ला केल्याने छोटेलाल जखमी झाला. याचवेळी मिरजपूर/पांढराबोडी (मध्य प्रदेश) निवासी शंकरलाल तुरकर (वय 60) हेसुद्धा दुचाकीने जात होते. त्यांनाही वाघाने हल्ला करून जखमी केले. ही घटना राज्यमार्गावरून जाणाऱ्या वाहनधारकांच्या लक्षात येताच त्यांनी मदतीसाठी धाव घेतली. त्यामुळे वाघाने शेतशिवारात पलायन केले.

सकाळपासूनच वाघाचा धुमाकूळ

नागरिकांच्या मदतीने जखमी छोटेलाल ठाकरे, शंकरलाल तुरकर, आणि विजय शहारे यांना ग्रामीण रुग्णालयात उपचारासाठी दाखल करण्यात आले. घटनास्थळापासून वनविभागाचे कार्यालय चार किलोमीटर अंतरावर आहे. सकाळपासूनच वाघाने धुमाकूळ घातल्याची माहिती वनपरिक्षेत्राधिकारी यांना मोबाईलवरून देण्यात आली होती. परंतु, दोन तासांनंतर वनविभागाची चमू घटनास्थळी पोहोचली.

जेरबंद करण्याची जबाबदारी वनविभागाची

गोंदेखारी गावात वाघ दिसल्यानंतर त्याला जेरबंद करण्याची जबाबदारी वनविभागाने पार पाडली नाही. घटनास्थळावर पोलिस निरीक्षक ठाकूर यांनी आपल्या चमूसह दाखल होत वाघाला पाहण्यासाठी धावणाऱ्या नागरिकांना रोखून धरले. सध्या बिनाखी शेतशिवारात वाघाने ठाण मांडले असून वनविभाग त्याच्या हालचालीवर नजर ठेवून आहे.

जाणून घ्या : ठरलं... हिंगणा मार्गावर मंगळवारपासून धावणार नागपूर मेट्रो

मृत्यूच्या दाढेतून सुटका

वाघ आल्याची माहिती होताच हजारो नागरिकांनी वाघाला पाहण्यासाठी घटनास्थळी धाव घेतली. यावेळी शेतशिवारात उभ्या असलेल्या गर्दीतील वीरेंद्र शहारे (वय 45, रा. सिंदपुरी) याच्यावर वाघाने हल्ला केला. त्याच्या कंबरेचा चावा घेतला.

छाताडावर साक्षात मृत्यू

तब्बल 10 ते 15 मिनिटे वाघ वीरेंद्रच्या अंगावर बसून होता. जणूकाही वीरेंद्रच्या छाताडावर साक्षात मृत्यू बसून असल्याने तो निपचित पडून होता. नागरिकांना गलका करीत वाघाच्या दिशेने धाव घेतल्याने तो कालव्यात पळून गेला. नशीब बलवत्तर होते म्हणून वाचले त्याचे प्राण.