चिचपल्लीतील आगीची तज्ज्ञांकडून चौकशी होणार, वडेट्टीवारांनी जळीत बांबू प्रशिक्षण केंद्राची केली पाहणी

चंद्रपूर : चिचपल्ली येथील बांबू प्रशिक्षण केंद्राच्या आगीत मोठ्या प्रमाणात नुकसान झाले असून, या घटनेची चौकशी करण्यासाठी आयएएस अधिकाऱ्यांच्या मार्गदर्शनात तांत्रिक बाबींची माहिती असलेल्या तज्ज्ञ सदस्यांची उच्चस्तरीय समिती नेमण्यात येईल, असे पालकमंत्री विजय वडेट्टीवार यांनी शुक्रवारी सांगितले. 

हेही वाचा - काय सांगता, संजय राठोड यांची कॉँगेस उपाध्यक्षपदी वर्णी

चिचपल्ली येथील बांबू प्रशिक्षण व संशोधन केंद्राची निर्माणाधीन इमारत गुरुवारी (ता.२५) आगीत जळाल्याने त्याची पाहणी पालकमंत्री वडेट्टीवार यांनी केली. त्यावेळी ते बोलत होते. याप्रसंगी त्यांच्यासोबत जिल्हाधिकारी अजय गुल्हाने, जिल्हा परिषदेचे मुख्य कार्यकारी अधिकारी राहुल कर्डिले, सार्वजनिक बांधकाम विभागाच्या अधीक्षक अभियंता सुषमा साखरवडे, चिचपल्ली बांबू प्रशिक्षण व संशोधन केंद्राच्या संचालक के. एम. अभर्णा, वनाधिकारी सुशील मंतावार उपस्थित होते. 

हेही वाचा - बाप रे बाप! युवकाच्या घरात सापडल्या तब्बल २१ तलवारी; समोर आलं धक्कादायक सत्य 

अपघातग्रस्त रुग्णांची सांत्वना -

सिंदेवाही येथे गुरुवारी लग्न वऱ्हाड्यांच्या ट्रकला झालेल्या अपघातात जखमींची पालकमंत्री वडेट्टीवार यांनी शुक्रवारी जिल्हा शासकीय रुग्णालयात जाऊन चौकशी केली. यावेळी रुग्णालयात भरती असलेल्या देवराव अटरगडे, यशवंत मेश्राम, मंजू कोरटनाके, पवन टिकरे, आलिशा उईके, निशा मेश्राम व इतर जखमींना काही काळजी करू नका, सर्व व्यवस्थित होईल, असा धीर त्यांनी दिला. मतदार संघात मोठा अपघात झाल्याने सर्व कामे थांबवून जखमींना पाहण्यासाठी मुंबईहून तातडीने चंद्रपूर येथील रुग्णालयात आल्याचे त्यांनी सांगितले. यावेळी जिल्हाधिकारी अजय गुल्हाने, जिल्हा परिषदेचे मुख्य कार्यकारी अधिकारी राहुल कर्डिले, शासकीय वैद्यकीय महाविद्यालयाचे प्रभारी अधिष्ठाता नीलेश तुमराम, शल्यचिकित्सा विभागाचे प्रमुख ललित तामगाडगे, समन्वयक उमेश आडे सोबत होते.