मध्यरात्री गावकरी शांत झोपले असताना झाली हालचाल; येऊन पाहताच चौघांना दिला चोप

अमरावती : शेतात काढलेले सोयाबीन शेतकऱ्याने घरासमोर प्लॅस्टिक ताडपत्रीखाली झाकून ठेवले होते. परंतु, रात्रीला त्या ढिगाऱ्यावरून ही पोती एका वाहनात टाकून लंपास करणाऱ्या चौघांना ग्रामस्थांनी पकडून पोलिसांच्या स्वाधीन केले. लोणी ठाण्याच्या हद्दीत जळू फाट्याजवळ ही घटना घडली.

पोलिसांनी दिलेल्या माहितीनुसार, परमानंद नारायण केकने (वय ५०), राजेंद्र शंकर पवार (वय ३९), हिवरेश हिवराज भोसले (वय १९), किसन किशोर राठोड (वय १८, सर्व रा. आजंती बेडा, नेरपरसोपंत) अशी अटकेतील चौघांची नावे असल्याचे लोणी पोलिसांनी सांगितले. चौघांविरुद्ध सोयाबीन चोरीचा गुन्हा लोणी ठाण्यात दाखल झाला आहे.

कुणाल राजेंद्र पाटील (वय २८) यांनी याप्रकरणी पोलिसात तक्रार नोंदवली. पाटील यांनी शेतात पिकविलेले सोयाबीनचे ३१ कट्टे अंगणात आणून ठेवले होते. परंतु, रात्री कुणीतरी ते कट्टे उचलून काही अंतरावर असलेल्या वाहनात टाकत असल्याचे त्यांच्या लक्षात आले. पाटील यांनी गावातील काही लोकांना उठवून सोयाबीन चोरी करणाऱ्या चौघांना पकडून चोप दिला.

हेही वाचा - हृदयस्पर्शी! मुळ गावी जाण्यासाठी कुटुंबीयांसह निघाला पती; वाटेत पत्नीने सोडली साथ, मुलं अनभिज्ञ

त्यानंतर त्यांना लोणी पोलिसांच्या स्वाधीन केले. त्यापूर्वी त्यांनी घटनास्थळावरून पळून जाण्याचाही प्रयत्न केला होता. सोयाबीनचे ३१ कट्टे व ज्या वाहनातून हे कट्टे नेण्यात येणार होते ते एमएच २९ एटी ०४६० क्रमांकाचे वाहन पोलिसांनी जप्त केले आहे.

संपादन - नीलेश डाखोरे