यवतमाळमधील घंटागाड्या जागच्या जागीच का थांबल्या… हे आहे कारण... वाचा सविस्तर

यवतमाळ : कचरा कंत्राटदारांनी तीन महिन्यांचे वेतन न दिल्याने शहरातील कचरा संकलन करण्याऱ्या घंटागाड्या या वाहनाच्या चालकांनी कामबंद आंदोलन पुकारले आहे. दरम्यान, या वाहनचालकांनी येथील नगरपालिका इमारतीसमोर आपली वाहने उभी केल्याने पुन्हा एकदा या वाहनांना ‘ब्रेक' लागल्याचे चित्र पाहावयास मिळत आहे.

यवतमाळ शहरातील कचरा संकलन करणाऱ्या या वाहनांच्या चालकांचा वेतनाचा प्रश्न गेल्या अनेक वर्षांपासून कायम आहे. कंत्राटदार बदलून गेल्यानंतरदेखील कर्मचाऱ्यांचे प्रश्न अजूनही सुटलेलेले दिसत नाहीत. संचारबंदीच्या काळातदेखील स्वच्छता कर्मचाऱ्यांनी स्वच्छतेची कामे केलीत. मात्र, या कामगारांना अजूनही वेतन मिळालेले नाही.

अन्यथा पुन्हा आंदोलन करणार

आठ दिवसांपूर्वीच कामगारांनी वेतनाच्या प्रश्नांवर आंदोलन केलेले होते. त्यावेळी समस्या निकाली काढण्याचे आश्वासन नगरपालिकेकडून देण्यात आलेले होते. मात्र, अजूनही या वेतनाच्या प्रश्‍नावर आवश्‍यक तो कायमस्वरूपी तोडगा काढण्यात आलेला नाही. त्याचा विपरीत परिणाम म्हणून संबंधित कर्मचाऱ्यांवर आपल्या वेतनासाठी पुन्हा एकदा आंदोलन करण्याची वेळ आलेली आहे.

मुख्याधिकाऱ्यांना दिले निवेदन

दरम्यान, याबाबत गांभीर्याने दखल घेऊन आमच्या गेल्या अनेक वर्षांपासून असलेल्या प्रलंबित मागण्या तातडीने सोडविण्यात याव्यात व आमचे वेतनही तातडीने देण्यात यावे, अशी मागणीही कर्मचाऱ्यांनी निवेदनात केली आहे. या मागण्यांचे निवेदन नगरपालिकेचे मुख्याधिकारी यांना देण्यात आले. निवेदन देताना मोहन भगत, विजय घुले, नितीन सयाम, बादल पेठकर, मनोज कबाडे आदी उपस्थित होते.

जाणून घ्या  : नकारानंतरही तो अल्पवयीन मुलीला म्हणाला, ‘तू फक्त माझीच गर्लफ्रेंड आहे' हे लक्षात ठेव

तीन महिन्यांपासून आर्थिक कोंडी

यवतमाळ शहरातील कचरा संकलन करणाऱ्या घंटागाडी या वाहनांवरील चालक व सहायक कर्मचाऱ्यांचे वेतन गेल्या तीन महिन्यांपासून प्रलंबित आहे. त्यामुळे या कर्मचाऱ्यांना आपल्यासह कुटुंबीयांचा गाडा हाकताना आर्थिक कोंडीचा सामना करावा लागत आहे. त्यातच गेल्या तीन महिन्यांपासून भविष्य निर्वाह निधीचा (पीएफ) भरणादेखील करण्यात आलेला नाही. त्यामुळे होणाऱ्या आर्थिक कोंडीतून घंटागाडी वाहनाचे चालक व मदतनीस यांनी हे कामबंद आंदोलन सुरू केले आहे.

(संपादन  : दुलिराम रहांगडाले)